పులివెందులలో హైటెన్షన్.. ఎంపీ అవినాశ్ రెడ్డి నివాసం వద్ద భారీగా పోలీసుల మోహరింపు

మున్సిపల్ ఎన్నికల నామినేషన్ల ప్రక్రియ చివరి రోజు కావడంతో కడప జిల్లా పులివెందులలో ఆదివారం ఉదయం ఉద్రిక్త వాతావరణం నెలకొంది. వైఎస్సార్ కాంగ్రెస్ పార్టీ ఎంపీ వైఎస్ అవినాశ్ రెడ్డి నివాసం వద్ద పోలీసులు భారీగా మోహరించారు. ఎలాంటి అవాంఛనీయ సంఘటనలు జరగకుండా నిరోధించేందుకు ఈ చర్యలు తీసుకున్నట్లు అధికారులు తెలిపారు.

అవినాశ్ రెడ్డి ఇంటితో పాటు స్థానిక వైసీపీ కార్యాలయం వద్ద కూడా పోలీసులు పటిష్ట బందోబస్తు ఏర్పాటు చేశారు. కార్యాలయం చుట్టూ ముళ్ల కంచెను సైతం ఏర్పాటు చేసి, ఎవరూ గుమిగూడకుండా ఆంక్షలు విధించారు. మరోవైపు, కడప నగరంలో వైసీపీ జిల్లా నేత రవీంద్రనాథ్ రెడ్డి, మాజీ మంత్రి అంజాద్ బాషాను పోలీసులు గృహనిర్బంధంలో ఉంచారు.

ఇదే తరహాలో పల్నాడు జిల్లాలోనూ పోలీసులు ముందస్తు చర్యలు చేపట్టారు. వినుకొండ మాజీ ఎమ్మెల్యే బొల్లా బ్రహ్మనాయుడిని నరసరావుపేటలోని ఆయన నివాసంలో గృహనిర్బంధం చేశారు. రాష్ట్రవ్యాప్తంగా స్థానిక సంస్థల ఎన్నికల నామినేషన్ల సందర్భంగా శాంతిభద్రతల పరిరక్షణలో భాగంగానే ఈ చర్యలు తీసుకుంటున్నామని, ఎవరూ గుంపులుగా చేరి ఉద్రిక్తతలు సృష్టించకుండా చూస్తున్నామని పోలీసు వర్గాలు వివరించాయి.