హ‌ర్మూజ్‌లో మునిగిన నౌక.. స‌ముద్ర తీరానికి కొట్టుకొచ్చిన‌ ఐఫోన్ల కోసం ఎగ‌బ‌డ్డ జ‌నం.. వైరల్ వీడియోల వెనుక నిజమెంత?

ప్రపంచ వాణిజ్యంలో కీలకమైన హ‌ర్మూజ్ జలసంధి సమీపంలో సముద్రంలో తేలియాడుతున్న కంటైనర్ల నుంచి ఐఫోన్లు, ఖరీదైన పర్ఫ్యూమ్‌లను స్థానిక జాలర్లు సేకరిస్తున్నారంటూ కొన్ని వీడియోలు సోషల్ మీడియాలో విపరీతంగా వైరల్ అవుతున్నాయి. అక్టోబర్ 14న సింగపూర్ జెండాతో ప్రయాణిస్తున్న 'జీఎఫ్ఎస్ ప్రైడ్' అనే భారీ కంటైనర్ నౌక మునిగిపోయిన నేపథ్యంలో ఈ వీడియోలు వెలుగులోకి వచ్చాయి. అయితే, ఈ వీడియోల వాస్తవికతపై పలు సందేహాలు వ్యక్తమవుతున్నాయి.

ఏం జరిగింది?
దాదాపు 2,500 కంటే ఎక్కువ కంటైనర్లతో ప్రయాణిస్తున్న జీఎఫ్ఎస్ ప్రైడ్ నౌకలో మంటలు చెలరేగి, తీవ్రంగా దెబ్బతిన్న తర్వాత మునిగిపోయిందని సింగపూర్ మారిటైమ్ అండ్ పోర్ట్ అథారిటీ ప్రకటించింది. అయితే, నౌకలోని 21 మంది సిబ్బందినీ సురక్షితంగా కాపాడామని, ఎవరికీ ఎలాంటి గాయాలు కాలేదని స్పష్టం చేసింది.

కానీ, 'ఇరాన్ ఇస్లామిక్ రివల్యూషనరీ గార్డ్ కార్ప్స్' (ఐఆర్‌జీసీ) మాత్రం దీనిపై భిన్నమైన కథనాన్ని వినిపిస్తోంది. ఆ నౌక అనధికారిక, ప్రమాదకరమైన మార్గంలోకి ప్రవేశించిందని, సముద్రంలో అమర్చిన మైన్‌ను ఢీకొట్టడం వల్లే పేలుడు సంభవించి మంటలు చెలరేగాయని ఆరోపించింది.

వైరల్ వీడియోలు.. వాస్తవాలు
ఈ ఘటన తర్వాత ఇరాన్‌కు చెందిన జాలర్లు, స్థానికులు చిన్న పడవల్లో సముద్రంలోకి వెళ్లి, తేలియాడుతున్న కంటైనర్ల నుంచి విలువైన వస్తువులను తీసుకుంటున్నట్లు కొన్ని వీడియోలు చక్కర్లు కొడుతున్నాయి. 

"ఓ నౌక మునిగిందని తెలిసింది, ఐఫోన్లు, పర్ఫ్యూమ్‌లు దొరుకుతాయని వెళ్తున్నాం" అని ఓ వ్యక్తి వీడియోలో చెప్పడం వినిపిస్తోంది. మరో వీడియోలో ఓ చిన్న పడవ ఏకంగా ఒక పెద్ద షిప్పింగ్ కంటైనర్‌ను లాక్కెళ్లేందుకు ప్రయత్నించడం కనిపించింది.

అయితే, ఈ వైరల్ క్లిప్పులపై వాస్తవ పరిశీలన జరిపిన అల్ జజీరా, అన్-నహర్ వంటి ఫ్యాక్ట్-చెక్ సంస్థలు, వీటిలో చాలా వరకు నకిలీవి లేదా ఏఐతో సృష్టించినవని తేల్చాయి. నిజంగానే కంటైనర్లలో ఐఫోన్లు ఉన్నాయా? స్థానికులు వాటిని సేకరించారా? అనే వాటికి స్వతంత్రంగా ఎలాంటి ఆధారాలు లభించలేదు.

ప్రపంచ చమురు, గ్యాస్ వాణిజ్యంలో కీలకమైన ఈ జలమార్గంలో వాణిజ్య నౌకలపై దాడులు ఇటీవల కాలంలో తీవ్రమయ్యాయి. ఈ ఉద్రిక్తతల మధ్య జీఎఫ్ఎస్ ప్రైడ్ నౌక మునిగిపోవడం గమనార్హం. ప్రమాదమా? లేక దాడి జరిగిందా? అనే దానిపై స్పష్టత రావాల్సి ఉంది.