భార్యను చంపి, ఉరి వేసుకుని టెక్కీ ఆత్మహత్య.. తనవారికి సమాచారం అందించాలని కంపెనీకి మెయిల్

హర్యానాలోని గురుగ్రామ్‌లో తీవ్ర విషాదం చోటుచేసుకుంది. ఒక సాఫ్ట్‌వేర్ ఇంజనీర్ తన భార్యను గొంతు నులిమి హత్య చేసి, అనంతరం తానూ ఉరివేసుకుని బలవన్మరణానికి పాల్పడ్డాడు. ఆత్మహత్యకు ముందు తన కార్యాలయ ఉన్నతాధికారులకు ఈ-మెయిల్ ద్వారా సమాచారం అందించడం ఈ ఘటనలో సంచలనంగా మారింది. గురుగ్రామ్ సెక్టార్ 68లోని M3M మెరీనా లగ్జరీ అపార్ట్‌మెంట్‌లో అక్టోబర్ 15న ఈ దారుణం వెలుగులోకి వచ్చింది.

అక్టోబర్ 15వ తేదీ ఉదయం 10:30 గంటల సమయంలో M3M మెరీనాలోని టవర్-7, ఫ్లాట్ నంబర్ 103లో దంపతులు మరణించి ఉన్నట్లు పోలీసు కంట్రోల్ రూమ్‌కు సమాచారం అందింది. వెంటనే ఘటనా స్థలానికి చేరుకున్న పోలీసులు, ఫ్లాట్ తలుపులు తెరిచి చూడగా మహిళ మృతదేహం నేలపై పడి ఉండగా, ఆమె భర్త సీలింగ్ ఫ్యాన్ హుక్‌కు ఉరివేసుకుని వేలాడుతూ కనిపించాడు.

మృతులను మహమ్మద్ అస్లాం (30), ఫర్హానా (28)గా గుర్తించారు. ఫర్హానా కేరళకు చెందిన మహిళ కాగా, అస్లాం బెంగళూరు నివాసి. అస్లాం గురుగ్రామ్‌లోని సెక్టార్ 58లో ఉన్న ఒక ఐటీ కంపెనీలో సాఫ్ట్‌వేర్ ఇంజనీర్‌గా విధులు నిర్వహిస్తున్నాడు. ఫర్హానా గృహిణి.

ఆత్మహత్యకు ముందు అస్లాం తన కంపెనీ ఉన్నతాధికారులకు ఈ-మెయిల్ పంపినట్లు దర్యాప్తులో తేలింది. తాను జీవితాన్ని ముగించుకుంటున్నానని, ఈ విషయాన్ని తన తండ్రికి, ఇంటి యజమానికి తెలియజేయాలని కోరుతూ వారి ఫోన్ నంబర్లను కూడా అందులో పేర్కొన్నాడు. ఈ మెయిల్ చూసిన వెంటనే కంపెనీ ప్రతినిధులు ఇంటి యజమానికి, పోలీసులకు సమాచారం అందించారు. అయితే పోలీసులు అక్కడికి చేరుకునేలోపే దంపతులిద్దరూ ప్రాణాలు కోల్పోయారు.

పోలీసులు సంఘటనా స్థలంలో ఒక సూసైడ్ నోట్‌ను స్వాధీనం చేసుకున్నారు. అస్లాం మొదట భార్యను గొంతు నులిమి చంపి, ఆపై తను ఆత్మహత్య చేసుకుని ఉంటాడని ఫోరెన్సిక్ బృందం ప్రాథమికంగా నిర్ధారించింది. అయితే ఈ ఘాతుకానికి గల కారణాలు ఇంకా స్పష్టం కాలేదు. పోలీసులు కేసు నమోదు చేసి, సూసైడ్ నోట్‌ ఆధారంగా అన్ని కోణాల్లో దర్యాప్తు జరుపుతున్నారు.