పనామాను వణికించిన భారీ భూకంపం.. 7.6గా తీవ్రత నమోదు

పనామాలో శుక్రవారం భారీ భూకంపం సంభవించింది. దేశ దక్షిణ తీర ప్రాంతంలో 7.6 తీవ్రతతో శక్తివంతమైన భూకంపం చోటుచేసుకుంది. ఈ ఘటనతో అధికారులు వెంటనే పసిఫిక్ తీర ప్రాంతాలకు సునామీ హెచ్చరికలు జారీ చేసినప్పటికీ, తర్వాత ప్రమాదం తప్పిందని నిర్ధారించి వాటిని ఉపసంహరించుకున్నారు.

అమెరికా జియోలాజికల్ సర్వే (యూఎస్‌జిఎస్) ప్రకారం, భూకంప కేంద్రం పిటలోజా అరిబా సమీపంలో, భూమికి కేవలం 10 కిలోమీటర్ల లోతులో ఉన్నట్లు గుర్తించారు. భూకంప తీవ్రతను తొలుత 8.0గా అంచనా వేసినప్పటికీ, తర్వాత 7.6కు సవరించారు. ఈ భూకంపం ధాటికి రాజధాని పనామా నగరంతో పాటు పొరుగున ఉన్న కోస్టా రికా రాజధానిలోనూ భవనాలు తీవ్రంగా కంపించాయి. భయంతో ప్రజలు ఇళ్ల నుంచి, కార్యాలయాల నుంచి బయటకు పరుగులు తీశారు. పెనోనోమే నగరంలోని ఒక కేథడ్రల్ టవర్ కూలిపోయిందని, మరికొన్ని నిర్మాణాలకు నష్టం వాటిల్లిందని ప్రాథమిక నివేదికలు చెబుతున్నాయి. పలు ప్రాంతాల్లో విద్యుత్ సరఫరాకు అంతరాయం ఏర్పడింది.

భూకంపం సంభవించిన వెంటనే, యూఎస్ సునామీ వార్నింగ్ సిస్టమ్ పనామా, కొలంబియా, ఈక్వడార్ సహా మధ్య అమెరికా పసిఫిక్ తీరాలకు సునామీ హెచ్చరికలు జారీ చేసింది. కొన్ని చోట్ల 1 నుంచి 3 మీటర్ల ఎత్తు వరకు అలలు ఎగసిపడవచ్చని అంచనా వేసింది. అయితే, కొంతసేపటి తర్వాత పసిఫిక్ సునామీ వార్నింగ్ సెంటర్ పరిస్థితిని సమీక్షించి, పెద్ద ప్రమాదం ఏమీ లేదని ప్రకటించింది. దీంతో సునామీ హెచ్చరికలను ఎత్తివేశారు.

ప్రధాన భూకంపం తర్వాత 6.6 తీవ్రతతో సహా పలుమార్లు భూమి కంపించింది. ఈ ఘటనలో ప్రాణనష్టంపై వెంటనే స్పష్టత రాలేదని, కొందరికి స్వల్ప గాయాలైనట్లు స్థానిక అధికారులు వెల్లడించారు. పనామా అధ్యక్షుడు జోస్ రాఉల్ ములినో ప్రజలు సంయమనం పాటించాలని కోరారు. పనామా కెనాల్ కార్యకలాపాలు యథాతథంగా కొనసాగుతున్నాయని అధికారులు తెలిపారు. ప్రస్తుతం అధికారులు నష్టం అంచనా వేసే పనిలో నిమగ్నమయ్యారు.