‘కల్కి’ ఆరంభం మాత్రమే.. పురాణాల్లో ఇంకా ఎన్నో సైన్స్‌ ఫిక్షన్‌ కథలున్నాయి: నాగ్‌ అశ్విన్‌

భారతీయ పురాణాల్లో సైన్స్‌ ఫిక్షన్‌ కథలకు కావాల్సిన అద్భుతమైన అంశాలు ఎన్నో ఉన్నాయని దర్శకుడు నాగ్‌ అశ్విన్‌ అన్నారు. ‘కల్కి 2898 ఏడీ’ వాటిని తెరపైకి తీసుకురావడంలో తొలి అడుగు మాత్రమేనని చెప్పారు. ఈ సినిమా విజయం మరింత భారీగా, కొత్త తరహాలో పురాణ కథలను చెప్పేందుకు సినీ పరిశ్రమకు నమ్మకం ఇచ్చిందని తెలిపారు.

నాగ్‌ అశ్విన్‌ దర్శకత్వంలో 2024లో వచ్చిన ‘కల్కి 2898 ఏడీ’ ప్రేక్షకుల నుంచి మంచి ఆదరణ పొందింది. తాజాగా 72వ జాతీయ చలనచిత్ర అవార్డుల్లో ‘బెస్ట్‌ పాపులర్‌ ఫిల్మ్‌ ప్రొవైడింగ్‌ హోల్‌సమ్‌ ఎంటర్‌టైన్‌మెంట్‌’, ‘బెస్ట్‌ స్పెషల్‌ ఎఫెక్ట్స్‌’ పురస్కారాలను అందుకుంది.

భారతీయ పురాణాల్లో కాలం, అమరత్వం, వినాశనం, పునర్జన్మ, అత్యాధునిక ప్రపంచాలకు సంబంధించిన ఆలోచనలు ఉన్నాయని నాగ్‌ అశ్విన్‌ చెప్పారు. వాటిని సైన్స్‌ ఫిక్షన్‌ కథలుగా మలిచేందుకు భారీ అవకాశం ఉందన్నారు.

‘మన పురాణాల్లోని సైన్స్‌ ఫిక్షన్‌ అవకాశాలను మనం ఇంకా పూర్తిగా ఉపయోగించుకోలేదా?’ అని ప్రశ్నించగా.. ‘కల్కి 2898 ఏడీ’ కేవలం ఆరంభం మాత్రమేనని ఆయన సమాధానమిచ్చారు. పురాణాల్లోని ప్రపంచాలు, ఆలోచనల నుంచి ఇంకా ఎన్నో కథలు పుట్టుకొచ్చే అవకాశం ఉందన్నారు.

భారీ స్థాయిలో ఇలాంటి సినిమా తీయొచ్చని ‘కల్కి 2898 ఏడీ’ నిరూపించిందని నాగ్‌ అశ్విన్‌ పేర్కొన్నారు. ఈ సినిమా విజయంతో నిర్మాతలు, నటులు కూడా ఇలాంటి ప్రయోగాత్మక కథలకు పెట్టుబడులు పెట్టేందుకు మరింత ధైర్యం చేస్తారని చెప్పారు.

ప్రభాస్‌, అమితాబ్‌ బచ్చన్‌, కమల్‌ హాసన్‌, దీపికా పదుకొణె, శోభన, దిశా పటానీ తదితరులు నటించిన ‘కల్కి 2898 ఏడీ’ కాశీ నేపథ్యంలో సాగుతుంది. 2898 ఏడీలో జరిగే కథగా తెరకెక్కిన ఈ చిత్రం ‘కల్కి సినిమాటిక్‌ యూనివర్స్‌’కు తొలి భాగం.