ఫ్యాన్స్‌ అత్యుత్సాహంతో ఉక్కిరిబిక్కిరి.. చేతులు జోడించి మరీ రిక్వెస్ట్‌ చేసిన సల్మాన్‌!

గణపతి దర్శనం కోసం రాజకీయ నాయకుడు ఆశిష్‌ షెలార్‌ ఇంటికి వెళ్లిన బాలీవుడ్‌ స్టార్‌ సల్మాన్‌ ఖాన్‌కు అభిమానుల నుంచి భారీ స్వాగతం ఎదురైంది. అయితే వారి అత్యుత్సాహం ఆయనను ఓ దశలో కొంత ఇబ్బంది పెట్టింది. బుధవారం రాత్రి వేడుకలు ముగించుకుని బయటకు వచ్చిన సల్మాన్‌ను చూసేందుకు అభిమానులు, ఫొటోగ్రాఫర్లు పెద్ద సంఖ్యలో గుమిగూడారు. దీంతో అతడు కారు వరకు వెళ్లడం కష్టంగా మారింది.

నుదుటిన తిలకం, క్యాజువల్‌ దుస్తుల్లో కనిపించిన సల్మాన్‌.. జనాన్ని పక్కకు జరగాలని కోరాడు. ఓ దశలో చేతులు జోడించి తనకు దారి ఇవ్వాలని అభిమానులను అభ్యర్థించాడు. భద్రతా సిబ్బంది కూడా జనాన్ని అదుపు చేస్తూ అతడిని కారు వద్దకు తీసుకెళ్లేందుకు ప్రయత్నించారు.

ఈ సమయంలో ఓ చిన్నారి సల్మాన్‌తో కరచాలనం చేసేందుకు అతడి వద్దకు వచ్చింది. సెక్యూరిటీ సిబ్బంది జనాన్ని నియంత్రించే క్రమంలో చిన్నారికి ఇబ్బంది కలగకుండా సల్మాన్‌ జాగ్రత్త తీసుకున్నాడు. చిన్నారితో కరచాలనం చేసిన తర్వాత అతడిని జనసందోహం నుంచి మెల్లగా పక్కకు తీసుకెళ్లి, అనంతరం తన కారులో బయలుదేరాడు.

ఇంతకుముందు సల్మాన్‌ తన సోదరుడు సోహైల్‌ ఖాన్‌ ఇంట్లో జరిగిన గణపతి నిమజ్జన కార్యక్రమంలో పాల్గొన్నాడు. అక్కడ హారతిలో పాల్గొన్న సమయంలో అతడు అపసవ్య దిశలో హారతి ఇవ్వడంతో సోదరి అర్పితా ఖాన్‌ శర్మ సరిచేసింది.

ప్రస్తుతం సల్మాన్‌ ‘బిగ్‌బాస్‌ 20’ సీజన్‌కు హోస్ట్‌గా వ్యవహరిస్తున్నాడు. వంశీ పైడిపల్లి దర్శకత్వంలో తెరకెక్కనున్న యాక్షన్‌ థ్రిల్లర్‌లో నయనతారతో కలిసి తొలిసారి నటించనున్నాడు. దిల్‌ రాజు నిర్మిస్తున్న ఈ సినిమా ‘SVC63’ పేరుతో తెరకెక్కుతోంది. 2027 ఈద్‌కు విడుదల కానుంది. ‘మాతృభూమి’లోనూ సల్మాన్‌ కనిపించనున్నాడు.