మన డైట్‌ మారాలి.. అప్పుడే భారత్‌లో మరింత మంది ఛాంపియన్లు: వేదాంత్‌ మాధవన్‌

భారత్‌లో ప్రతిభకు కొదవ లేదని.. కానీ ఆ ప్రతిభకు తగ్గ ఫలితాలు రావాలంటే ఆహారపు అలవాట్లలో మార్పు రావాలని ప్రముఖ నటుడు ఆర్‌. మాధవన్‌ కుమారుడు, స్విమ్మర్‌ వేదాంత్‌ మాధవన్‌ అభిప్రాయపడ్డాడు. సరైన ఆహారం, క్రమశిక్షణ, పట్టుదల ఉంటే భారత్‌ నుంచి మరింత మంది అత్యుత్తమ క్రీడాకారులు రావచ్చని చెప్పాడు. ప్రస్తుతం ఆసియా క్రీడలకు సిద్ధమవుతున్న అతడు.. భారత క్రీడారంగం ఎదుర్కొంటున్న అంశాలపై తన అభిప్రాయాలను పంచుకున్నాడు.

2026 ఆసియా క్రీడలు జపాన్‌లోని ఐచి ప్రిఫెక్చర్‌ (రాష్ట్రం), నాగోయాలో సెప్టెంబర్‌ 19 నుంచి అక్టోబర్‌ 4 వరకు జరగనున్నాయి. ఈ పోటీల్లో వేదాంత్‌ భారత్‌ తరఫున స్విమ్మింగ్‌లో బరిలోకి దిగనున్నాడు. శ్రీహరి నటరాజ్‌, సాజన్‌ ప్రకాశ్‌ వంటి అనుభవజ్ఞులైన స్విమ్మర్లతో కలిసి అతడు పోటీపడనున్నాడు.

పీటీఐకి ఇచ్చిన ఇంటర్వ్యూలో వేదాంత్‌ మాట్లాడుతూ.. భారతీయుల్లో సహజంగానే మంచి ప్రతిభ ఉంటుందన్నాడు. ఆహారం, క్రమశిక్షణ, ప్రేరణపై మరింత దృష్టి పెడితే ప్రపంచ స్థాయిలో మంచి క్రీడాకారులను తయారు చేయొచ్చని అభిప్రాయపడ్డాడు.

భారతీయుల ఆహారంలో ప్రొటీన్‌ మరింత పెరగాల్సిన అవసరం ఉందని వేదాంత్‌ చెప్పాడు. శరీర నిర్మాణంలో కొన్ని ప్రత్యేక లక్షణాల వల్ల కొవ్వు నిల్వ ఎక్కువగా ఉండే అవకాశం ఉందని వివరించాడు. అందుకే సరైన ఆహారంతో శరీరాన్ని తీర్చిదిద్దుకోవడం ముఖ్యమన్నాడు.

తాను కూడా డైటీషియన్‌ సలహాలు తీసుకుంటున్నట్లు తెలిపాడు. ఆహారంలో మార్పులు చేసుకోవడం వల్ల తన ఫిట్‌నెస్‌, వేగంలో మంచి మార్పు కనిపించిందని చెప్పాడు. భారతీయులు తమ ఆహారంపై శ్రద్ధ పెడితే ఉన్న ప్రతిభను మరింతగా ఉపయోగించుకోగలమని అభిప్రాయపడ్డాడు.

వేదాంత్‌ ప్రధానంగా లాంగ్‌ డిస్టెన్స్‌ స్విమ్మర్‌. అయితే ఆసియా క్రీడల్లో 200 మీటర్ల ఫ్రీస్టైల్‌లో పోటీ పడనున్నాడు. ఇది తనకు అలవాటైన విభాగానికి భిన్నమని చెప్పాడు.

గత కొన్ని నెలలుగా వెయిట్‌ ట్రైనింగ్‌, స్ట్రెంత్‌ కండిషనింగ్‌పై ఎక్కువగా దృష్టి పెట్టినట్లు తెలిపాడు. ముఖ్యంగా కాళ్ల బలం, కిక్స్‌, చీలమండల సౌలభ్యాన్ని మెరుగుపరుచుకుంటున్నానని చెప్పాడు.

ప్రపంచ స్థాయి పోటీల్లో కోట్లాది మంది చూపు మనపై ఉన్నప్పుడు ఒత్తిడి సహజమేనని వేదాంత్‌ అన్నాడు. అలాంటి సమయంలో తాను గెలవగలననే నమ్మకం క్రీడాకారుడికి ఉండాలని చెప్పాడు.

విజయం సాధించాలంటే కొంత ఆత్మవిశ్వాసం, గెలవాలనే పట్టుదల అవసరమని పేర్కొన్నాడు. పెద్ద లక్ష్యాన్ని పెట్టుకుని ముందుకు సాగితే కనీసం దాని దిశగా అయినా చాలా దూరం వెళ్లగలమని చెప్పాడు.