సిరాజ్‌ చేతికి హైదరాబాద్‌ పగ్గాలు.. రంజీలో అసలు పరీక్ష!

రంజీ ట్రోఫీ కొత్త సీజన్‌కు హైదరాబాద్‌ జట్టు కొత్త ఉత్సాహంతో సిద్ధమవుతోంది. భారత స్టార్‌ పేసర్‌ మహ్మద్‌ సిరాజ్‌కు జట్టు పగ్గాలు అప్పగించింది హైదరాబాద్‌ క్రికెట్‌ అసోసియేషన్‌ (హెచ్‌సీఏ). 2026-27 సీజన్‌లో హైదరాబాద్‌కు సిరాజ్‌ కెప్టెన్‌గా వ్యవహరించనున్నాడు. చామా మిలింద్‌ను వైస్‌ కెప్టెన్‌గా ఎంపిక చేశారు.

అక్టోబర్‌ 11 నుంచి రంజీ ట్రోఫీ ప్రారంభం కానుంది. తొలి మ్యాచ్‌లో త్రిపురతో హైదరాబాద్‌ తలపడనుంది. హైదరాబాద్‌ ఎలైట్‌ గ్రూప్‌-బిలో ఉంది. సౌరాష్ట్ర, కర్ణాటక, పంజాబ్‌, ఆంధ్రప్రదేశ్‌, ఛత్తీస్‌గఢ్‌, అసోం, త్రిపుర ఈ గ్రూపులో ఉన్నాయి.

ఇటీవల శ్రీలంక పర్యటనలో సిరాజ్‌ ఆశించిన స్థాయిలో వేగం చూపలేకపోయాడు. సాధారణంగా గంటకు 140 కిలోమీటర్లకు పైగా వేగంతో బంతులు వేసే అతడు.. అక్కడ 120 కిలోమీటర్ల వేగంతో బౌలింగ్‌ చేశాడు. రెండు మ్యాచ్‌ల్లో 44 ఓవర్లు వేసి నాలుగు వికెట్లు తీసుకున్నాడు.

రెండు నెలల విరామం తర్వాత నేరుగా మ్యాచ్‌ ఆడటంతో తన బౌలింగ్‌ లయ దెబ్బతిన్నట్లు సిరాజ్‌ తెలిపాడు. రన్‌అప్‌లో అడుగులు సరిగ్గా పడకపోవడంతో వేగం తగ్గిందని చెప్పాడు.

దులీప్‌ ట్రోఫీ ఫైనల్లో మాత్రం సిరాజ్‌ తిరిగి లయ అందుకున్నాడు. శ్రీలంక నుంచి వచ్చిన కొన్నిరోజులకే చెన్నై మ్యాచ్‌ ఆడినా.. దేశం తరఫున ఆడేటప్పుడు సాకులు చెప్పకూడదని స్పష్టం చేశాడు. జట్టు కోసం పూర్తి స్థాయిలో కష్టపడటమే తనకు ముఖ్యమని చెప్పాడు.

ఇప్పుడు హైదరాబాద్‌ కెప్టెన్‌గా సిరాజ్‌ ముందు మరో సవాలు ఉంది. నాయకత్వంతో పాటు బంతితోనూ సత్తా చాటేందుకు అతడికి రంజీ సీజన్‌ మంచి అవకాశం కానుంది.