అమెరికా మీడియా దృష్టిలో ‘బ్రిక్స్‌’‌.. మారుతున్న ప్రపంచ సమీకరణాలకు వేదిక

ప్రపంచ రాజకీయాల్లో మారుతున్న సమీకరణాలకు న్యూఢిల్లీలో జరుగుతున్న ‘బ్రిక్స్‌’ శిఖరాగ్ర సమావేశం అద్దం పడుతోందని ప్రముఖ అమెరికా పత్రికలు విశ్లేషించాయి. అమెరికా కూటములతో పెరుగుతున్న విభేదాలు, ప్రాంతీయ యుద్ధాలు, వాషింగ్టన్‌-బీజింగ్‌ మధ్య పోటీ ఈ సమావేశానికి ప్రాధాన్యం పెంచాయని పేర్కొన్నాయి.

మోదీ-జిన్‌పింగ్‌ ప్రభావంపై ఆసక్తి
‘ది న్యూయార్క్‌ టైమ్స్‌’ కథనం ప్రకారం.. అభివృద్ధి చెందుతున్న దేశాలపై ప్రధాని నరేంద్ర మోదీ, చైనా అధ్యక్షుడు షీ జిన్‌పింగ్‌లో ఎవరి ప్రభావం పెరుగుతుందన్నది ఆసక్తికరంగా మారింది. అమెరికా ఆధిపత్యాన్ని సవాలు చేసేందుకు ‘బ్రిక్స్‌’‌ను ఉపయోగించుకోవాలని చైనా  చూస్తోంది. భారత్‌ మాత్రం ఏ దేశమైనా ఒక కూటమి వైపు మొగ్గాల్సిన పరిస్థితి రాకుండా ‘బ్రిక్స్‌’‌ విస్తృత వేదికగా కొనసాగాలని కోరుకుంటోంది.

అమెరికా-చైనా మధ్య భారత్‌ సమతూకం
యుద్ధాలు, ఇంధన ధరల పెరుగుదల, అమెరికా సుంకాలు, కృత్రిమ మేధపై ఆందోళన వంటి అంశాల ఆధారంగా దేశాలు తమ విదేశాంగ విధానాలను పునఃపరిశీలించేలా చేస్తున్నాయని పత్రిక పేర్కొంది. భారత్‌-చైనా సంబంధాల్లో 2024లో మొదలైన దౌత్యపరమైన కదలికకు ఈ సమావేశం మరో వేదికగా మారింది.

పుతిన్‌, ఇరాన్‌ అధ్యక్షుడితో మోదీ భేటీ
‘వాల్‌ స్ట్రీట్‌ జర్నల్‌’ ప్రకారం.. భారత్‌, చైనాల సంబంధాలు అమెరికాతో కొత్త దశలోకి వెళుతున్న నేపథ్యంలో ఇరుదేశాల మధ్య ఉద్రిక్తతలు తగ్గించే అవకాశం ఏర్పడింది. అయితే సరిహద్దు వివాదం, పాకిస్థాన్‌తో చైనా సన్నిహిత సంబంధాలు, హిందూ మహాసముద్రంలో భద్రతా పోటీ అడ్డంకులుగా ఉన్నాయి.

ఉక్రెయిన్‌, మధ్యప్రాచ్య యుద్ధాల ప్రభావం
‘వాషింగ్టన్‌ పోస్ట్‌’ బ్రిక్స్‌ సమావేశాన్ని భారత్‌కు క్లిష్టమైన సమతూక పరీక్షగా అభివర్ణించింది. రష్యా అధ్యక్షుడు వ్లాదిమిర్‌ పుతిన్‌, ఇరాన్‌ అధ్యక్షుడు మసూద్‌ పెజెష్కియాన్‌, జిన్‌పింగ్‌ సహా నేతలు సమావేశానికి హాజరవుతున్నారు. రష్యా, ఇరాన్‌తో భారత్‌ తన సంబంధాలను కొనసాగిస్తూనే అమెరికా, యూరప్‌, జపాన్‌, ఆస్ట్రేలియాతో భాగస్వామ్యాలను విస్తరిస్తోంది. ఉక్రెయిన్‌, మధ్యప్రాచ్య యుద్ధాలు ‘బ్రిక్స్‌’‌లోని సభ్య దేశాల మధ్య విభేదాలను మరింత స్పష్టంగా చూపే అవకాశం ఉందని పత్రిక పేర్కొంది.

ట్రంప్‌తో జిన్‌పింగ్‌ భేటీకి ముందు
ఏడేళ్ల తర్వాత జిన్‌పింగ్‌ భారత్‌లో పర్యటిస్తున్నారు. సెప్టెంబరు 24న అమెరికా అధ్యక్షుడు డొనాల్డ్‌ ట్రంప్‌తో ఆయన వైట్‌హౌస్‌లో భేటీ కానున్నారు. దీంతో న్యూఢిల్లీ ‘బ్రిక్స్‌’‌ సమావేశానికి మరింత వ్యూహాత్మక ప్రాధాన్యం ఏర్పడిందని అమెరికా మీడియా పేర్కొంది.