ప్రెగ్నెన్సీపై సమంత ఓపెన్ టాక్.. ఎన్ని కిలోలు పెరిగిందో తెలిస్తే షాక్ అవుతారు!

ప్రముఖ నటి సమంత రూత్ ప్రభు ప్రస్తుతం తన గర్భధారణ కాలాన్ని పూర్తిస్థాయిలో ఆస్వాదిస్తున్నారు. ఈ ప్రయాణంలోని ప్రతి దశను, తన అనుభవాలను అభిమానులతో, కాబోయే తల్లులతో పంచుకుంటున్నారు. తాజాగా ఇన్‌స్టాగ్రామ్‌లో 'ఆస్క్ మీ ఎనీథింగ్' సెషన్ నిర్వహించిన ఆమె, తన ప్రెగ్నెన్సీకి సంబంధించిన ఎన్నో ఆసక్తికర విషయాలను వెల్లడించారు. ఈ సందర్భంగా ఆమె కొత్త తల్లులు, గర్భవతులతో ముచ్చటించారు.

"బిడ్డ కోసం అవసరమైన వస్తువులన్నీ కొన్నాను. కానీ, ఇప్పుడు వాటిని చూస్తుంటే కాస్త భయంగా ఉంది" అంటూ సమంత తన పోస్ట్‌లో పేర్కొన్నారు. ఈ సెషన్‌లో ఒక అభిమాని గర్భధారణ సమయంలో బరువు పెరగడం గురించి ప్రస్తావించగా, సమంత బదులిస్తూ.. "మీ బాధ నాకు అర్థమైంది. నేను ఇప్పటికే 11 కిలోలు పెరిగాను" అని తెలిపారు. మరో అభిమాని "బాగా నిద్రపోండి, మీ జీవితం పూర్తిగా మారిపోబోతోంది" అని సలహా ఇవ్వగా, సమంత ఆసక్తికరంగా స్పందించారు.

ఇటీవలే తల్లిగా మారిన ఓ యువతి తన దినచర్య గురించి వివరిస్తూ.. "నా బిడ్డకు పాలు పట్టడం, త్రేన్పు తెప్పించడం, జోల పాడటం.. ఇదే రిపీట్ అవుతోంది" అని చెప్పగా, "అది వింటుంటేనే ఒక ఫుల్ టైమ్ ఉద్యోగంలా అనిపిస్తోంది" అని సమంత అన్నారు. బిడ్డకు ఏం పేరు పెట్టాలనుకుంటున్నారని ఒకరు అడగ్గా.. "ఇది నేను ఊహించిన దానికంటే చాలా కష్టంగా ఉంది. బహుశా దీనికి మీ సహాయం అవసరమవుతుంది అనుకుంటున్నాను" అని బదులిచ్చారు.

ఈ ప్రెగ్నెన్సీ ప్రయాణాన్ని మీరు ఆస్వాదిస్తున్నారా? అని అడగ్గా, "మనస్ఫూర్తిగా ఆస్వాదిస్తున్నాను" అని ఆమె ఒప్పుకున్నారు. మాతృత్వానికి ఎలాంటి మాన్యువల్ ఉండదని ఒక అభిమాని చెప్పగా, "అది నిజమే. మాతృత్వం చాలా అందమైన, మాయతో కూడిన, జీవితాన్ని మార్చే అనుభవం. అయితే, దీనికోసం ఒక మాన్యువల్ ఉంటే బాగుండేది" అని సమంత సరదాగా వ్యాఖ్యానించారు. ఈ ప్రయాణం తనను ఎంతో శక్తిమంతంగా మార్చిందని, మొదట తాను ఎక్కువగా కంగారు పడతానని అనుకున్నానని ఆమె పేర్కొన్నారు.  కాగా, సమంత, రాజ్ నిడిమోరు ఈ ఏడాది డిసెంబర్‌లో తమ బిడ్డకు స్వాగతం పలకనున్నట్లు తెలుస్తోంది.