రాజకీయాల్లోకి ధనుష్? ఊహాగానాలకు బలం చేకూర్చిన జీవీ ప్రకాశ్ వ్యాఖ్యలు

తమిళ స్టార్ హీరో ధనుష్ రాజకీయ రంగప్రవేశంపై సర్వత్రా చర్చ సాగుతున్న తరుణంలో, ప్రముఖ సంగీత దర్శకుడు జీవీ ప్రకాశ్ కుమార్ కీలక వ్యాఖ్యలు చేశాడు. ధనుష్ రాజకీయాల్లోకి వస్తే తన సంపూర్ణ మద్దతు ఉంటుందని ఆయన స్పష్టం చేశాడు. ఈ పరిణామం ప్రస్తుతం కోలీవుడ్‌లో హాట్ టాపిక్‌గా మారింది.

వివరాల్లోకి వెళితే.. ధనుష్ తనకు అత్యంత ఆప్తుడని, సన్నిహిత మిత్రుడని జీవీ ప్రకాశ్ పేర్కొన్నాడు. "ధనుష్ ఏ నిర్ణయం తీసుకున్నా నేను ఆయన వెంటే ఉంటాను. ఒకవేళ ఆయన రాజకీయాల్లోకి అడుగుపెడితే, నా మద్దతు కచ్చితంగా ఆయనకే ఉంటుంది" అని స్పష్టం చేశాడు.

గత కొంతకాలంగా ధనుష్ రాజకీయ అరంగేట్రంపై పలు ఊహాగానాలు వినిపిస్తున్నాయి. ఇటీవల ‘ఓం’ సినిమా చిత్రీకరణ నిమిత్తం తిరువన్నామలై వెళ్లిన సందర్భంలో ఆయన అభిమానులతో ముచ్చటించడం చర్చనీయాంశమైంది. వీటికి తోడు, 'ఆల్ ఇండియా ధనుష్ ఫ్యాన్స్ అసోసియేషన్' కోయంబత్తూరు జిల్లాలోని ఐదు నియోజకవర్గాల్లో కొత్తగా సంక్షేమ సంఘాలను ఏర్పాటు చేస్తున్నట్లు ప్రకటించింది. ఈ పరిణామాలను ధనుష్ రాజకీయ ప్రవేశానికి సన్నాహకాలుగానే రాజకీయ విశ్లేషకులు భావిస్తున్నారు. ఈ క్రమంలో జీవీ ప్రకాశ్ చేసిన వ్యాఖ్యలు ప్రాధాన్యం సంతరించుకున్నాయి.