భారత్‌లో 'స్పైడర్ మ్యాన్' వసూళ్ల సునామీ.. రూ. 500 కోట్లు కొల్లగొట్టిన హాలీవుడ్ చిత్రం.. వ‌ర‌ల్డ్‌వైడ్‌గా ఎంత రాబ‌ట్టిందంటే!

హాలీవుడ్ స్టార్స్ టామ్ హాలండ్, జెండయా ప్రధాన పాత్రల్లో నటించిన సూపర్ హీరో చిత్రం 'స్పైడర్ మ్యాన్: బ్రాండ్ న్యూ డే' ప్రపంచవ్యాప్తంగా బాక్సాఫీస్ వద్ద వసూళ్ల సునామీ సృష్టిస్తోంది. జులై 31న విడుదలైన ఈ సినిమా, అంచనాలకు మించి భారీ విజయాన్ని నమోదు చేస్తూ గ్లోబల్ బాక్సాఫీస్ వద్ద 2 బిలియన్ డాలర్ల (సుమారు రూ. 19,120 కోట్లు) మార్క్‌ను దాటింది. మార్వెల్ సినిమాటిక్ యూనివర్స్ (ఎంసీయూ) నుంచి 38వ చిత్రంగా వచ్చిన ఈ సినిమా, కలెక్షన్ల పరంగా సరికొత్త రికార్డులు నెలకొల్పుతోంది.

ప్రముఖ ఎంటర్‌టైన్‌మెంట్ మీడియా సంస్థ ‘ది హాలీవుడ్ రిపోర్టర్’ కథనం ప్రకారం.. ఈ చిత్రం ఇప్పటివరకు ప్రపంచవ్యాప్తంగా 2.02 బిలియన్ డాలర్లను వసూలు చేసింది. కేవలం గ్లోబల్ మార్కెట్‌లోనే కాకుండా భారతీయ బాక్సాఫీస్ వద్ద కూడా ఈ చిత్రం ప్రభంజనం సృష్టించింది. ఇండియాలో రూ. 500 కోట్లకు పైగా వసూళ్లు సాధించి, ఇక్కడ అత్యధిక వసూళ్లు రాబట్టిన హాలీవుడ్ చిత్రంగా సరికొత్త చరిత్ర సృష్టించింది. భారీ విజయాలు సాధించిన క్రిస్టోఫర్ నోలన్ చిత్రం 'ది ఒడిస్సీ', 'అబ్సెషన్' రికార్డులను ఇది బద్దలు కొట్టింది.

డెస్టిన్ డానియల్ క్రెటన్ దర్శకత్వం వహించిన ఈ చిత్రంలో టామ్ హాలండ్ మరోసారి స్పైడర్ మ్యాన్‌గా అద్భుతమైన నటన కనబరిచారు. జెండయా... మిచెల్ జోన్స్-వాట్సన్ పాత్రలో ఆకట్టుకున్నారు. ఈ చిత్రంలో స్పైడర్ మ్యాన్ ఒక కొత్త, శక్తిమంతమైన ప్రతినాయకుడిని ఎదుర్కోవడమే కాకుండా, శారీరకంగా ఊహించని మార్పులకు లోనవుతాడు. ఈ కాన్సెప్ట్ ప్రేక్షకులను బాగా ఆకట్టుకుంది.

కెవిన్ ఫేజ్, అమీ పాస్కల్ నిర్మించిన ఈ చిత్రంలో జాకబ్ బటాలన్ (నెడ్ లీడ్స్), క్రోండన్ (టూంబ్‌స్టోన్), శాడీ సింక్ (జీన్ గ్రే) ముఖ్య పాత్రలు పోషించారు. వీరితో పాటు మార్క్ రఫెలో (హల్క్), జోన్ బెర్న్‌తల్ (పనిషర్), మైఖేల్ మాండో (స్కార్పియన్) వంటి ప్రముఖ నటులు కూడా ఈ సినిమాలో భాగమై అదనపు ఆకర్షణగా నిలిచారు. మొత్తం మీద 'బ్రాండ్ న్యూ డే' మార్వెల్ స్టూడియోస్‌కు మరో భారీ బ్లాక్‌బస్టర్‌గా నిలిచిపోయింది.