ఫేక్ యాప్స్ మోసం: గూగుల్ ఇండియా హెడ్‌పై హైదరాబాద్‌లో కేసు

హైదరాబాద్‌లో వెలుగుచూసిన భారీ సైబర్ మోసం కేసుల్లో గూగుల్ ఇండియా కంట్రీ హెడ్ ప్రీతి లోబానా పేరును పోలీసులు చేర్చారు. గూగుల్ ప్లే స్టోర్‌ వేదికగా చలామణి అవుతున్న నకిలీ స్టాక్ మార్కెట్ ఇన్వెస్ట్‌మెంట్ యాప్‌ల ద్వారా జరిగిన మోసాలకు సంబంధించి నమోదైన మూడు వేర్వేరు కేసుల్లో ఆమెను సహ నిందితురాలిగా పేర్కొంటూ హైదరాబాద్ సైబర్ క్రైమ్ పోలీసులు ఎఫ్‌ఐఆర్ నమోదు చేశారు. ఈ మోసాల కారణంగా బాధితులు మొత్తం రూ. 48 లక్షలకు పైగా నష్టపోయినట్లు నిర్ధారణ అయింది.

ఈ కేసులు జూన్ చివరి వారం నుంచి జూలై మధ్య కాలంలో నమోదయ్యాయి. సంతోష్‌నగర్‌కు చెందిన ఒక 69 ఏళ్ల వృద్ధుడు, ఫేస్‌బుక్‌లో కేంద్ర ఆర్థిక మంత్రి నిర్మలా సీతారామన్ ఫొటోతో కూడిన ప్రకటన చూసి మోసపోయారు. వాట్సాప్ ద్వారా పరిచయమైన ఓ మహిళ సూచన మేరకు సదరు యాప్‌ను డౌన్‌లోడ్ చేసుకుని రూ.24.37 లక్షలు కోల్పోయారు. అదేవిధంగా, ఆదిభట్లకు చెందిన 40 ఏళ్ల ప్రభుత్వ ఉద్యోగి మరో నకిలీ ట్రేడింగ్ యాప్ ద్వారా రూ.17 లక్షలు, ఎర్రగడ్డకు చెందిన 71 ఏళ్ల రిటైర్డ్ ఉద్యోగి రూ.7 లక్షలు నష్టపోయారు.

ఈ మోసపూరిత యాప్‌లను గూగుల్ ప్లే స్టోర్ నుంచి తొలగించాలని గూగుల్‌ సంస్థకు ఇప్పటికే నోటీసులు జారీ చేసినట్లు సైబర్ క్రైమ్ అధికారులు వెల్లడించారు. ఐటీ చట్టంలోని సెక్షన్ 79(3) ప్రకారం, ప్రభుత్వ ఏజెన్సీలు ఆదేశించినా అక్రమ కంటెంట్‌ను తొలగించడంలో విఫలమైతే సదరు మధ్యవర్తిత్వ సంస్థలు చట్టపరమైన బాధ్యత వహించాల్సి ఉంటుంది. ఈ నిబంధన ఆధారంగానే గూగుల్ ఇండియా హెడ్‌పై కేసు నమోదు చేసినట్లు సమాచారం.

ఈ కేసుల్లో ప్రధాన నిందితులతో పాటు ప్రీతి లోబానాపై ఐటీ చట్టం మరియు భారతీయ న్యాయ సంహిత (బీఎన్ఎస్) కింద మోసం, ఫోర్జరీ వంటి అభియోగాలతో కేసులు నమోదు చేశారు. ఈ పరిణామాలపై గూగుల్ సంస్థ నుంచి లేదా ప్రీతి లోబానా నుంచి అధికారిక స్పందన రావాల్సి ఉంది.