రెండేళ్ల గ్యాప్‌కు క్షమాపణలు.. నన్ను మీ ఇంటివాడిని చేసుకోండి: తిరుపతిలో అఖిల్ ఎమోషనల్ స్పీచ్

అక్కినేని యువ హీరో అఖిల్ తన రాబోయే చిత్రం 'లెనిన్' ప్రీ రిలీజ్ ఈవెంట్‌లో తీవ్ర భావోద్వేగానికి గురయ్యారు. తిరుపతిలో అభిమానుల కోలాహలం మధ్య జరిగిన ఈ కార్యక్రమంలో ఆయన మాట్లాడుతూ, దాదాపు రెండున్నరేళ్లుగా అభిమానులకు ముఖం చూపించలేకపోయినందుకు క్షమాపణలు చెప్పారు. "గ్యాప్ వచ్చేసింది, అందరికీ సారీ. మీతో కమ్యూనికేట్ చేయలేకపోయాననే బాధ నా మనసులో ఉంది. దయచేసి నన్ను మీ ఇంటి వాడిగా చేసుకోండి, నన్ను మీ ఇంటికి తీసుకెళ్లిపోండి. అప్పుడే నేను సంతోషంగా ఉంటాను" అంటూ అఖిల్ చేసిన వ్యాఖ్యలు అభిమానులను కదిలించాయి.

నాలోని బాధే 'లెనిన్' కథ
ఈ సుదీర్ఘ విరామం తర్వాత తాను ఒక పాజిటివ్ మైండ్‌సెట్‌తో వచ్చానని అఖిల్ తెలిపారు. 'లెనిన్' సినిమా తన జీవితంలోకి ఎలా వచ్చిందో వివరిస్తూ, "రెండేళ్ల క్రితం మీ సీమ బిడ్డ, దర్శకుడు నందు మురళీ కిశోర్ అబ్బూరు ఒక అద్భుతమైన కథ చెప్పారు. ఆ కథలో నా మైండ్‌లో రన్ అవుతున్న పెయిన్, జర్నీ కనిపించాయి. ఇది నా కోసమే రాశావు, ఇంకెవరితోనూ చేయవద్దని వెంటనే అతడిని హగ్ చేసుకుని చెప్పాను" అని అఖిల్ గుర్తుచేసుకున్నారు. దర్శకుడు నందును తనకు అందించినందుకు ఆయన తల్లిదండ్రులకు వేదికపైనే కృతజ్ఞతలు తెలిపారు. జూలై 10న 'లెనిన్' చిత్రంతోనే వారికి ధన్యవాదాలు తెలియజేస్తామని అన్నారు.

టీమ్‌పై ప్రశంసల వర్షం
ఈ సినిమా ప్రయాణంలో తనకు అండగా నిలిచిన ప్రతి ఒక్కరినీ అఖిల్ పేరుపేరునా స్మరించుకున్నారు. సంగీత దర్శకుడు తమన్ ఈ సినిమాకు ప్రాణం పోశాడని, కొన్నిచోట్ల పూనకాలు తెప్పించే సంగీతం ఇచ్చాడని కొనియాడారు. "నన్ను, నా జర్నీని అర్థం చేసుకున్నందుకు థాంక్యూ నందు. నువ్వు దొరకకపోయి ఉంటే నేను 'లెనిన్'తో వచ్చేవాడిని కాదు" అని దర్శకుడిపై తన అభిమానాన్ని చాటుకున్నారు. చిత్ర కథానాయిక భాగ్యశ్రీ బోర్సే నటనను ఎంతగానో మెచ్చుకున్నారు. "సెట్‌లో ఆమె నటన చూసి, నేను మరింత ఒళ్లు దగ్గర పెట్టుకుని నటించాల్సి వచ్చింది" అని ప్రశంసించారు. అలాగే నిర్మాతలు నాగవంశీ, తన తండ్రి నాగార్జున ప్రోత్సాహాన్ని, బ్రహ్మాజీ, శివాజీ, సునీల్ వంటి సీనియర్ నటుల సహకారాన్ని కూడా అఖిల్ ప్రత్యేకంగా ప్రస్తావించారు.

ఇక సినిమానే మాట్లాడుతుంది
ఈసారి తాను ఎక్కువగా మాట్లాడబోనని, జూలై 10న సినిమానే మాట్లాడుతుందని అఖిల్ స్పష్టం చేశారు. "రెండున్నరేళ్లుగా మేం పడిన కష్టానికి థియేటర్లలో వచ్చే స్పందనే సమాధానం. అప్పుడే నేను మాట్లాడతాను. ఇప్పుడు మీ ఇంటి వాడిగా వచ్చాను, నన్ను ఆదరించండి" అంటూ తన ప్రసంగాన్ని ముగించారు. అఖిల్ అక్కినేని, భాగ్యశ్రీ బోర్సే జంటగా మురళి కిశోర్ అబ్బూరు దర్శకత్వంలో తెరకెక్కిన 'లెనిన్' చిత్రం జూలై 10న ప్రేక్షకుల ముందుకు రానుంది.