హేమమాలిని 'డ్రీమ్ గాళ్' ఇలా అయ్యింది!

బాలీవుడ్ ఎవర్ గ్రీన్ బ్యూటీ, ప్రముఖ నటి, రాజకీయ నాయకురాలు హేమమాలినిని అభిమానులు ప్రేమగా 'డ్రీమ్ గాళ్' అని పిలుచుకుంటారు. అయితే, ఆమెకు ఆ పేరు ఎలా స్థిరపడిపోయిందో చాలా మందికి తెలియదు. ఈ బిరుదు వెనుక ఉన్న ఆసక్తికరమైన కథను ఆమె 'ది కపిల్ శర్మ షో'లో పంచుకున్నారు. తన సినిమా కంటే ముందే తనకు ఆ పేరు ఎలా వచ్చిందో వివరించి అందరినీ ఆశ్చర్యపరిచారు.

హేమమాలిని హిందీలో అడుగుపెట్టిన తొలి చిత్రం 'సప్నో కా సౌదాగర్' (1968). ఈ సినిమా నిర్మాత బి. అనంతస్వామి ఓ అద్భుతమైన ప్రచార వ్యూహంతో ముందుకు వచ్చారు. సినిమా విడుదల కాకముందు, హీరోయిన్ ఎవరో చెప్పకుండా "డ్రీమ్ గాళ్ వస్తోంది" (Dream Girl coming to town) అంటూ ముంబై అంతటా పోస్టర్లు వేయించారు. ఇది అప్పట్లో పెద్ద సంచలనం సృష్టించింది. ఆ డ్రీమ్ గాళ్ ఎవరనే దానిపై సర్వత్రా ఆసక్తి నెలకొంది.

ఈ విషయంపై హేమమాలిని మాట్లాడుతూ.. "నా తొలి సినిమా విడుదలకు సిద్ధమవుతోంది. కానీ, పోస్టర్ల మీద ఎక్కడా నా పేరు కనిపించడం లేదు. అంతటా 'డ్రీమ్ గాళ్, డ్రీమ్ గాళ్' అనే కనిపిస్తోంది. వాళ్లేం చేస్తున్నారో అర్థం కాక నేను కాస్త ఆందోళన చెందాను. అప్పుడు నిర్మాత అనంతస్వామి గారు నాతో, 'నీ పేరును మేం ఇలాగే పరిచయం చేయబోతున్నాం. ఆ డ్రీమ్ గాళ్ ఎవరో కాదు, హేమమాలిని అని ఆ తర్వాత మేమే ప్రకటిస్తాం' అని చెప్పారు. ఆయన ఆలోచన అద్భుతంగా ఫలించింది. ఆ పేరు నాకు శాశ్వతంగా నిలిచిపోయింది" అని వివరించారు.

మహేశ్ కౌల్ దర్శకత్వం వహించిన 'సప్నో కా సౌదాగర్' చిత్రంలో రాజ్ కపూర్, హేమమాలిని, తనూజ, నదిరా ప్రధాన పాత్రలు పోషించారు. శంకర్ జైకిషన్ అందించిన సంగీతం కూడా మంచి విజయం సాధించింది.

ఆశ్చర్యకరంగా, ఈ బిరుదు వచ్చిన దాదాపు దశాబ్దం తర్వాత, 1977లో హేమమాలిని 'డ్రీమ్ గాళ్' పేరుతోనే వచ్చిన మరో సినిమాలో ప్రధాన పాత్రలో నటించారు. ప్రమోద్ చక్రవర్తి దర్శకత్వం వహించిన ఈ చిత్రంలో అశోక్ కుమార్, ధర్మేంద్ర, ప్రేమ్ చోప్రా వంటి అగ్ర తారలు ఉన్నారు. ఈ సినిమాలో హేమమాలిని అనాథ పిల్లల ఆశ్రమాన్ని నడపడం కోసం డబ్బు సంపాదించడానికి సప్న, పద్మ, చంపాబాయి, డ్రీమ్ గాళ్, రాజ్ కుమారి అనే ఐదు విభిన్న పాత్రలలో కనిపిస్తారు. లక్ష్మీకాంత్-ప్యారేలాల్ స్వరపరిచిన ఈ చిత్రంలోని "డ్రీమ్ గాళ్" పాటను కిశోర్ కుమార్ ఆలపించారు. ఈ పాట ఎవర్ గ్రీన్ హిట్ గా నిలిచి, హేమమాలిని 'డ్రీమ్ గాళ్' బిరుదును భారత సినీ చరిత్రలో చిరస్థాయిగా నిలబెట్టింది.