విడుదలకు ముందే ప్రకంపనలు సృష్టిస్తున్న హాలీవుడ్ చిత్రం 'ఒడిస్సీ'

ప్రఖ్యాత హాలీవుడ్ దర్శకుడు క్రిస్టోఫర్ నోలన్ తన నూతన చిత్రంతో మరోసారి ప్రపంచవ్యాప్తంగా సంచలనం సృష్టిస్తున్నారు. ఆయన దర్శకత్వంలో రూపుదిద్దుకుంటున్న 'ది ఒడిస్సీ' చిత్రం కోసం ప్రపంచవ్యాప్తంగా ఉన్న ఐమ్యాక్స్ స్క్రీన్లన్నింటినీ ప్రత్యేకంగా కేటాయించారు. దీని ప్రభావంతో, జులై 31న విడుదల కానున్న మార్వెల్ చిత్రం 'స్పైడర్ మ్యాన్: బ్రాండ్ న్యూ డే'కు ప్రారంభ వారంలో ఐమ్యాక్స్ థియేటర్లు లభించని పరిస్థితి నెలకొంది.

ప్రాచీన గ్రీకు రచయిత హోమర్ రచించిన ప్రాచీన గాథ ఆధారంగా రూపొందిన 'ది ఒడిస్సీ'లో మ్యాట్ డామన్ గ్రీకు రాజు ఒడిస్సియస్‌ పాత్రలో నటిస్తున్నారు. ఈ సినిమాను పూర్తిగా ఐమ్యాక్స్ ఫిల్మ్ కెమెరాలతో చిత్రీకరించారు. ఈ ఘనత సాధించిన తొలి ఫీచర్ ఫిల్మ్‌గా ఇది చరిత్ర సృష్టించింది. దాదాపు రెండు దశాబ్దాలుగా నోలన్, ఐమ్యాక్స్ సంస్థ సంయుక్తంగా కృషి చేసి ఈ సాంకేతిక మైలురాయిని అధిగమించారు. ఈ కారణం చేతనే ప్రీమియం థియేటర్లలో ఈ చిత్రానికి అగ్ర ప్రాధాన్యత లభించింది.

జులై 17న విడుదల కానున్న 'ది ఒడిస్సీ' సుమారు మూడు వారాల పాటు ఐమ్యాక్స్ స్క్రీన్లపై ఏకచత్రాధిపత్యం వహించనుంది. భారత్‌లో కూడా ఇదే పరిస్థితి కొనసాగే అవకాశం ఉంది. దీంతో 'స్పైడర్ మ్యాన్' చిత్రం ఐమ్యాక్స్‌కు బదులుగా స్క్రీన్‌ఎక్స్, 4డీఎక్స్, డాల్బీ సినిమా వంటి ఇతర ప్రీమియం ఫార్మాట్లలో విడుదల కానుంది. వాస్తవానికి స్పైడర్ మ్యాన్ చిత్రాన్ని కూడా ఐమ్యాక్స్‌కు అనువైన 1.90:1 యాస్పెక్ట్ రేషియోలో చిత్రీకరించడం గమనార్హం.

ఐమ్యాక్స్ స్క్రీన్లు దక్కకపోయినప్పటికీ, 'స్పైడర్ మ్యాన్' అడ్వాన్స్ బుకింగ్స్ పలు దేశాల్లో రికార్డులను సృష్టిస్తున్నాయి. గతంలో నోలన్ తెరకెక్కించిన 'ఓపెన్‌హైమర్' విడుదల సమయంలోనూ ఇలాంటి ఆసక్తికర పోటీనే నెలకొంది. మరోవైపు 'ది ఒడిస్సీ'లో మ్యాట్ డామాన్‌తో పాటు టామ్ హాలండ్, అన్నేహాథవే, రాబర్ట్ ప్యాటిన్సన్, జెండాయా వంటి భారీ తారాగణం నటిస్తోంది.