పాకిస్థాన్‌లో ఫ్రాన్స్ మహిళకు నరకం.. 12 ఏళ్లుగా గృహ నిర్బంధం.. గుట్టు విప్పిన కుమారుడి సాహసం!

పాకిస్థాన్‌లోని ఖైబర్ పఖ్తుంఖ్వా ప్రాంతంలో ఒక భయంకరమైన గృహ నిర్బంధం ఉదంతం వెలుగులోకి వచ్చింది. ఆఫ్ఘనిస్థాన్ సరిహద్దుకు సమీపంలోని బారా అనే మారుమూల పట్టణంలో తన భర్త చేతిలో 12 ఏళ్లుగా బందీగా ఉంటూ, తీవ్రమైన గృహ హింసను ఎదుర్కొంటున్న 54 ఏళ్ల ఫ్రెంచ్ మహిళ సిల్వీ యాస్మినాను, ఆమె ఐదుగురు పిల్లలను పాకిస్థాన్ పోలీసులు రక్షించారు.

ఈ నెల 18న అందిన ఫిర్యాదు ఆధారంగా పోలీసులు ఈ రెస్క్యూ ఆపరేషన్ చేపట్టారు. యాస్మినా కుమారుల్లో ఒకరు ఎలాగోలా ఇల్లు దాటి బయటకు వచ్చి పోలీసులను ఆశ్రయించడంతో ఈ దారుణం బయటపడింది. వెంటనే స్పందించిన జిల్లా పోలీసు చీఫ్ వకార్ అహ్మద్ నేతృత్వంలోని బృందం బారాలోని ఒక మట్టి ఇటుకల ఇంటిపై దాడి చేసి ఆ కుటుంబాన్ని రక్షించింది.

ఆస్ట్రేలియాలో పరిచయం - పాక్‌లో నరకం
బాధితురాలు యాస్మినా తెలిపిన వివరాల ప్రకారం.. 2000వ దశకం ప్రారంభంలో ఆమెకు ఆస్ట్రేలియాలో ఒక పాకిస్థాన్ జాతీయుడితో పరిచయమైంది. ఆ తర్వాత వారు వివాహం చేసుకున్నారు. 2014 నుండి వారు పాకిస్థాన్‌లోని ఈ మారుమూల ప్రాంతంలో నివసిస్తున్నారు. అయితే, గత 12 ఏళ్లుగా భర్త తనను, పిల్లలను బయటి ప్రపంచంతో సంబంధం లేకుండా గృహ నిర్బంధం చేశాడని, రోజూ శారీరక, మానసిక హింసకు గురిచేస్తున్నాడని ఆమె పోలీసులకు వివరించింది. పాకిస్థాన్‌లోనే జన్మించిన ఆమె పిల్లలను కనీసం స్కూళ్లకు కూడా పంపించలేదని తేలింది.

నిందితుడిపై పలు కేసులు.. అరెస్ట్
యాస్మినా ఇచ్చిన ఫిర్యాదు మేరకు గృహ హింస, అక్రమ నిర్బంధం కేసుల కింద ఆమె భర్త అహ్మద్ ఖాన్‌ను పోలీసులు అరెస్ట్ చేశారు. బాధిత మహిళ, పిల్లలను ప్రస్తుతం పెషావర్‌లోని మహిళా పోలీస్ స్టేషన్‌కు తరలించి రక్షణ కల్పించారు. సుదీర్ఘ కాలం పాటు బందీలుగా ఉన్న కారణంగా పిల్లలు తీవ్రమైన ఇబ్బందులు పడ్డారని, వారిలో ఒకరికి వినికిడి, మాట లోపం కూడా ఉందని పోలీసులు గుర్తించారు. ప్రస్తుతం యాస్మినా తన పిల్లలతో కలిసి తిరిగి ఫ్రాన్స్ వెళ్ళిపోవాలని కోరుకుంటోంది.