పుట్టినరోజే నన్ను వదిలివెళ్లావా?.. ఇన్స్టాలో కన్నీటి పోస్ట్.. వెలుగులోకి ప్రియురాలి ఘాతుకం!

పూణెలో అత్యంత దారుణమైన ఘటన వెలుగులోకి వచ్చింది. నిశ్చితార్థం చేసుకున్న యువకుడిని, అతని కాబోయే భార్యే తన ప్రియుడితో కలిసి దారుణంగా హత్య చేసింది. మహారాష్ట్రలోని పూణె సమీపంలోని  లోనావాలా వద్ద గల ప్రఖ్యాత లోహగడ్ కోటపై ఈ ఘోరం జరిగింది. కొన్ని నెలల క్రితమే నిశ్చితార్థం చేసుకున్న 20 ఏళ్ల సియా గోయల్, తన కాబోయే భర్త కేతన్ అగర్వాల్ (25)ను హత్య చేసినట్లు అంగీకరించింది. ఈ హత్యకు ఆమె ప్రియుడు చేతన్ చౌదరి (22) కూడా సహకరించినట్లు పోలీసులు తెలిపారు. ఈ ఘటన దేశవ్యాప్తంగా సంచలనం సృష్టిస్తోంది.

ప్రమాదంగా చిత్రీకరణ.. ఇన్స్టాగ్రామ్ నాటకం
ఈ నెల‌ 18న కేతన్ అగర్వాల్ లోహగడ్ కోటపై నుంచి లోయలో పడి మరణించాడు. ఫొటోలు తీసుకుంటుండగా ప్రమాదవశాత్తు కాలుజారి పడిపోయాడని తొలుత అందరూ భావించారు. పోలీసులు కూడా యాక్సిడెంటల్ డెత్‌గానే కేసు నమోదు చేశారు. కేతన్ మరణం తర్వాత సియా గోయల్ తన ఇన్‌స్టాగ్రామ్‌లో పెట్టిన ఓ పోస్ట్ అందరినీ ఆశ్చర్యపరిచింది.

 కేతన్‌తో కలిసి డ్యాన్స్ చేస్తున్న వీడియోను షేర్ చేస్తూ.. "నా పుట్టినరోజే నన్ను వదిలి వెళ్లిపోయావు. పెళ్లికి ఇంత దగ్గరగా ఉన్నప్పుడు ఎందుకు ఇలా చేశావు? నిన్ను అంతగా ప్రేమించిన నన్ను ఎందుకు వదిలేశావు? నీ ఆత్మకు శాంతి కలగాలి" అని ఎంతో ఆవేదనతో రాసుకొచ్చింది. దీంతో పాటు "మేరే దిల్ కో పతా హై కీ తూ యహీ హై. వాపస్ ఆజా" (నువ్వు ఇక్కడే ఉన్నావని నా మనసుకు తెలుసు. తిరిగి రా) అనే క్యాప్షన్‌తో మరో వీడియో పోస్ట్ చేసింది.

పోలీసుల దర్యాప్తులో వీడిన మిస్టరీ
అయితే, కేసును లోతుగా దర్యాప్తు చేసిన పోలీసులకు విస్తుపోయే నిజాలు తెలిశాయి. సియా గోయల్, చేతన్ చౌదరి గత ఏడాది నుంచి ప్రేమించుకుంటున్నారు. ఇద్దరూ పూణెలోని సంపన్న వ్యాపార కుటుంబాలకు చెందినవారే. కేతన్‌తో పెళ్లికి సియా ఇష్టపడలేదు. తమ ప్రేమకు కేతన్ అడ్డుగా ఉన్నాడని భావించి, అతన్ని హతమార్చాలని పథకం రచించారు. ప్లాన్ ప్రకారం ఈ నెల‌ 18న కేతన్‌ను లోహగడ్ కోటకు తీసుకెళ్లి, పైనుంచి లోయలోకి తోసేసినట్లు విచారణలో అంగీకరించారు.

రెండో ప్రయత్నంలో హత్య: తండ్రి ఆరోపణ
మృతుడు కేతన్ తండ్రి విశాల్ అగర్వాల్ ఈ ఘటనపై సంచలన ఆరోపణలు చేశారు. తన కొడుకుపై ఇది రెండో హత్యాయత్నం అని ఆయన తెలిపారు. ఈ నెల‌ 14న కూడా సియా, చేతన్ కలిసి కేతన్‌ను చంపడానికి ప్రయత్నించారని, కానీ అది విఫలమైందని ఆయన ఆరోపించారు. 

"ఈ దారుణంలో సియా తల్లిదండ్రులు, సోదరుడు, అత్తకు కూడా ప్రమేయం ఉందని నేను గట్టిగా నమ్ముతున్నాను. వాళ్లందరికీ మొదటి నుంచి అన్నీ తెలుసు. ఈ ఘోరానికి పాల్పడిన ప్రతి ఒక్కరినీ కఠినంగా శిక్షించాలి" అని ఆయన డిమాండ్ చేశారు. సియా, చేతన్ సంబంధంపై తన కొడుకు కేతన్‌కు ముందే అనుమానాలు ఉన్నాయని కూడా ఆయన పేర్కొన్నారు. నిందితులిద్దరినీ అరెస్ట్ చేసిన పోలీసులు, మృతుడి తండ్రి ఆరోపణల నేపథ్యంలో కేసును మరింత లోతుగా విచారిస్తున్నారు.