అభిమాని పులి సీత 11 ఏళ్ల కల.. నెరవేర్చిన చిరంజీవి
- వైరల్ అయిన ఇంటర్వ్యూతో పులి సీత కలను నెరవేర్చిన చిరంజీవి
- అభిమానిని స్వయంగా ఇంటికి ఆహ్వానించి ఆత్మీయంగా పలకరించిన మెగాస్టార్
- చిరంజీవికి ఆంజనేయస్వామి చిత్రపటాన్ని బహుమతిగా ఇచ్చిన నటి
- గిఫ్ట్ విలువ ధరలో కాదు, ఇచ్చే ప్రేమలో ఉంటుందన్న చిరంజీవి
- ఇది జీవితంలో మరచిపోలేని రోజంటూ పులి సీత భావోద్వేగం
వైరల్ అయిన ఆ ఇంటర్వ్యూ
ఇటీవల ఓ ఇంటర్వ్యూలో పులి సీత మాట్లాడుతూ.. "తిరుపతి శ్రీ వెంకటేశ్వర స్వామి దర్శనం దొరుకుతుందేమో కానీ, చిరంజీవి గారిని కలవడం అంత సులభం కాదు" అంటూ కన్నీటి పర్యంతమయ్యారు. సినీ పరిశ్రమకు వచ్చి పదకొండేళ్లు గడిచినా తన ఆరాధ్య దైవాన్ని కలిసే అవకాశం రాలేదని, ఆయన వద్ద ఉన్నవారు తనకు సహకరించలేదని ఆవేదన వ్యక్తం చేశారు. ఈ వ్యాఖ్యలు సోషల్ మీడియాలో విస్తృతంగా వ్యాపించి, చిరంజీవి దృష్టికి వెళ్లాయి.
ఆహ్వానం.. ఆత్మీయ పలకరింపు
అభిమాని ఆవేదనను గమనించిన చిరంజీవి వెంటనే స్పందించారు. తన బృందంతో పులి సీతను సంప్రదించి, నిన్న తన ఇంటికి రావాల్సిందిగా ఆహ్వానించారు. ఊహించని ఈ పిలుపుతో ఉబ్బితబ్బిబ్బయిన పులి సీత, మెగాస్టార్ నివాసానికి వెళ్లి ఆయన్ను కలిశారు. ఈ సందర్భంగా చిరంజీవికి ఆయన ఆరాధ్య దైవమైన ఆంజనేయస్వామి చిత్రపటంతో కూడిన ప్రత్యేక ఫొటో ఫ్రేమ్ను బహుమతిగా అందించారు.
ఆ కానుకను స్వీకరించిన చిరంజీవి ఎంతో సంతోషం వ్యక్తం చేశారు. "గిఫ్ట్ విలువ దాని ధరలో ఉండదు. దాన్ని ఇచ్చే వ్యక్తి ప్రేమ, అభిమానంలో ఉంటుంది. నాకు అత్యంత ఇష్టమైన హనుమంతుడి చిత్రాన్ని ఇవ్వడం చాలా ప్రత్యేకంగా అనిపించింది. ఇది నా హృదయానికి ఎంతో దగ్గరైన కానుక" అని ఆయన పులి సీతను అభినందించారు.
చిరంజీవిని కలిసిన అనంతరం పులి సీత తన ఆనందాన్ని సోషల్ మీడియా ద్వారా పంచుకున్నారు. "చిన్నప్పటి నుంచి ఆరాధించిన వ్యక్తిని కలవడం జీవితంలో మరచిపోలేని అనుభూతి. నిజమైన అభిమానానికి భగవంతుడు తప్పక ఫలితం ఇస్తాడు. ఇది నా జీవితంలో ఎప్పటికీ గుర్తుండిపోయే రోజు" అంటూ ఆమె తన సంతోషాన్ని వ్యక్తం చేశారు. ప్రస్తుతం ఈ వీడియో, ఫొటోలు సోషల్ మీడియాలో వైరల్గా మారాయి.
