నా 15 ఏళ్ల కెరీర్‌లో నాన్న ఒక్క ఫీడ్‌బ్యాక్ ఇవ్వలేదు.. 72 ఏళ్ల వయసులోనూ ఆయ‌న ఫిట్‌గా ఉండ‌టానికి కార‌ణం అదే: రామ్ చరణ్

మెగాపవర్ స్టార్ రామ్ చరణ్ తన సినీ ప్రయాణం, మెగాస్టార్ చిరంజీవి తనయుడిగా ఎదుర్కొన్న ఒత్తిడి, తండ్రితో తనకున్న అనుబంధంపై ఆసక్తికర విషయాలు పంచుకున్నారు. ఇటీవలే 'పెద్ది' సినిమాతో భారీ విజయాన్ని అందుకున్న ఆయన, తన అర్ధాంగి ఉపాసన కొణిదెలతో కలిసి రిపబ్లిక్ సమ్మిట్ 2026లో పాల్గొన్నారు. ఈ వేదికగా ఆయన తన వ్యక్తిగత, వృత్తిపరమైన జీవితానికి సంబంధించిన పలు అంశాలపై మనసు విప్పి మాట్లాడారు.

స్టార్‌డమ్ వేడిని మా ఇంటికి రానివ్వలేదు 
చిన్నప్పటి రోజులను గుర్తుచేసుకుంటూ.. "చిన్నప్పటి నుంచి మా ఇంటికి వచ్చే దర్శకులు, నిర్మాతలు 'ఒకరోజు నువ్వు కూడా మీ నాన్నగారి అడుగుజాడల్లో నడవాలి' అని చెప్పి నా భుజాలపై పెద్ద భారం మోపేవారు. కానీ, ఆ విషయాలను నేను పెద్దగా పట్టించుకోలేదు. మా నాన్న మాతో చాలా సమయం గడిపేవారు. సినిమా సంభాషణలు గానీ, ఇతర విషయాలు గానీ మా డైనింగ్ టేబుల్ వద్దకు గానీ, లివింగ్ రూమ్‌లోకి గానీ వచ్చేవి కావు. వాటన్నింటినీ ఆఫీస్ వ‌ర‌కే పరిమితం చేసేవారు. స్టార్‌డమ్ వేడిని మేము ఎప్పుడూ అనుభవించలేదు. ఆయన మమ్మల్ని చాలా సాధారణంగా పెంచారు" అని రామ్ చరణ్ వివరించారు.

తొలి సినిమా తర్వాత వారసత్వం పనిచేయదు
సినీ కుటుంబం నుంచి రావడం వల్ల కలిగే ప్రయోజనాలు, సవాళ్ల గురించి చరణ్ మరింత విపులంగా మాట్లాడారు. "సినీ కుటుంబం నుంచి వస్తే ఒక అందమైన వేదిక దొరుకుతుందన్నది వాస్తవమే. కానీ, కష్టపడి సంపాదించిన డబ్బుతో టికెట్ కొని థియేటర్‌కు వచ్చే ప్రేక్షకులు, తెరపై ఎవరి కొడుకు ఉన్నాడని చూడరు. సినిమా బాగుందా లేదా, అందులోని విషయం ఏంటనేదే చూస్తారు. మన కష్టం, పని పట్ల మనకున్న చిత్తశుద్ధి మాత్రమే ముఖ్యం. మొదటి సినిమా తర్వాత వారసత్వం అనేదే పనిచేయదు" అని ఆయన స్పష్టం చేశారు.

చిరంజీవి ఫిట్‌నెస్ రహస్యం చెప్పిన చరణ్ 
తన తండ్రి చిరంజీవి గురించి మాట్లాడుతూ.. ఆయన క్రమశిక్షణ, పని పట్ల అంకితభావాన్ని రామ్ చరణ్ కొనియాడారు. "మా నాన్నగారికి ఇప్పుడు 72 ఏళ్లు. ఆయన ఉదయం 5:30 గంటలకు నిద్రలేస్తారు. కాఫీ తాగి, 6 గంటల కల్లా జిమ్‌లో ఉంటారు. నన్ను కూడా జిమ్‌కు రమ్మని పిలుస్తుంటారు. ఆయన తన వర్కౌట్‌ను, తనను తాను అందంగా చూసుకోవడాన్ని చాలా ఇష్టపడతారు. 'మీరు ఇంకా ఎందుకు ఇంత కష్టపడుతున్నారు?' అని నేను అడిగితే, 'రామ్, నేను కేవలం సినిమాల కోసం ఇది చేయడం లేదు. నా మెదడు చురుకుగా ఉండటానికి, మీ అందరి కోసం, నా మనవళ్లు, మనవరాళ్ల కోసం నేను జీవించాలనుకుంటున్నాను' అని చెప్పారు. ప్రస్తుతం ఆయన మూడు ప్రాజెక్టులతో బిజీగా ఉన్నారు" అని తెలిపారు.

నాన్న 15 ఏళ్లలో ఒక్కసారీ సలహా ఇవ్వలేదు  
అదే సమయంలో తన కెరీర్ విషయంలో చిరంజీవి జోక్యం చేసుకోలేదని చరణ్ ఒక ముఖ్యమైన విషయాన్ని వెల్లడించారు. "నా 15 ఏళ్ల సినీ కెరీర్‌లో ఆయన నాకు ఒక్కసారి కూడా ఫీడ్‌బ్యాక్ ఇవ్వలేదు. నన్ను ఎప్పుడూ చేతిపట్టుకుని నడిపించలేదు" అని చరణ్ చెప్పడం తండ్రిగా ఆయన తన పిల్లలకు ఇచ్చిన స్వేచ్ఛను తెలియజేస్తుంది. రిపబ్లిక్ సమ్మిట్ వేదికగా రామ్ చరణ్ పంచుకున్న ఈ విషయాలు ఆయన తండ్రి పట్ల ఉన్న గౌరవాన్ని, సినీ రంగంలో తనకంటూ ఓ గుర్తింపు తెచ్చుకోవడానికి ఆయన పడిన కష్టాన్ని తెలియజేస్తున్నాయి.