స్నేహితురాలి అంత్యక్రియల్లో కన్నీటిపర్యంతమైన సల్మాన్ ఖాన్!

బాలీవుడ్ స్టార్ హీరో సల్మాన్ ఖాన్ తీవ్ర భావోద్వేగానికి గురయ్యారు. తమ కుటుంబానికి చిరకాల మిత్రురాలు, అత్యంత ఆత్మీయురాలైన కుముద్ రాణే అంత్యక్రియల్లో ఆయన కన్నీటిపర్యంతమయ్యారు. మంగళవారం ముంబైలో నిర్వహించిన ఈ కార్యక్రమంలో సల్మాన్ తన కుటుంబ సభ్యులతో కలిసి పాల్గొని, ఆమెకు కడసారి వీడ్కోలు పలికారు.

శ్మశానవాటిక వద్ద సల్మాన్ చేతులు జోడించి, కన్నీటిని ఆపుకోవడానికి ప్రయత్నిస్తున్న దృశ్యాలు సామాజిక మాధ్యమాల్లో వైరల్‌గా మారాయి. ఈ కార్యక్రమంలో సల్మాన్ తల్లి సల్మా ఖాన్, సవతి తల్లి హెలెన్, సోదరులు సోహైల్ ఖాన్, అర్బాజ్ ఖాన్, సోదరి అర్పితా ఖాన్ శర్మ తదితరులు పాల్గొన్నారు. వీరితో పాటు నటి మలైకా అరోరా, నటుడు చుంకీ పాండే కూడా హాజరై నివాళులు అర్పించారు.

సల్మాన్ ఖాన్ కుటుంబంతో కుముద్ రాణేకి వృత్తిపరంగా, వ్యక్తిగతంగా దశాబ్దాల కాలంగా విడదీయలేని అనుబంధం ఉంది. కాగా, మే నెల ప్రారంభంలోనే సల్మాన్ తన మరో సన్నిహిత మిత్రుడు సుశీల్ కుమార్‌ను కోల్పోయారు. సుమారు 42 ఏళ్లుగా ఆయన తనకు సోదర సమానుడని అప్పట్లో సల్మాన్ గుర్తుచేసుకున్నారు. నెల రోజుల వ్యవధిలోనే ఇద్దరు ఆత్మీయులను కోల్పోవడంతో సల్మాన్ తీవ్ర విషాదంలో మునిగిపోయారు. ఈ నేపథ్యంలో, "ధైర్యంగా ఉండండి భాయిజాన్" అంటూ ఆయన అభిమానులు సోషల్ మీడియా వేదికగా ధైర్యం చెబుతున్నారు.