‘పెద్ది’ వివాదంపై జయా బచ్చన్ ఘాటు వ్యాఖ్యలు!
- పెద్దిలో జాన్వీ కపూర్ను చూపించిన విధానంపై వివాదం
- మహిళలను అందాల వస్తువుగా చూడొద్దంటూ హితవు
- ఘాటుగా స్పందించిన సీనియర్ నటి జయా బచ్చన్
- కరీనా కపూర్ సైతం ఆగ్రహం
- అందం కోసం బట్టలు పొట్టిగా చేయాల్సిన అవసరం లేదని సూచన
ఓ దర్శకుడు తనను కూడా ఇలాగే మితిమీరిన గ్లామరస్గా చూపించడానికి ప్రయత్నించాడని జయా బచ్చన్ గుర్తుచేసుకున్నారు. ‘‘అప్పుడు నేను వెంటనే అభ్యంతరం తెలిపాను. నా సెట్లో అలాంటి పనులు సాగనివ్వలేదు. ఆ తర్వాత మరే దర్శకుడూ నాతో ఆ గీత దాటడానికి ధైర్యం చేయలేదు. నన్ను కేవలం అందాల ప్రదర్శనకే పరిమితం చేయాలని చూసిన ఆ దర్శకుడితో నేను మళ్లీ ఎప్పుడూ పని చేయలేదు’’ అని ఆమె స్పష్టం చేశారు. మనోజ్ కుమార్ దర్శకత్వం వహించిన ‘షోర్’ సినిమా షూటింగ్ సమయంలో ఈ గొడవ జరిగినట్లు సమాచారం.
ఈ వివాదంపై స్టార్ హీరోయిన్ కరీనా కపూర్ ఖాన్ కూడా గట్టిగా స్పందించారు. తెరపై శృంగార రసాన్ని లేదా అందాన్ని పండించడానికి బట్టలు తగ్గించాల్సిన అవసరం లేదని ఆమె హితవు పలికారు. ‘‘కభీ ఖుషీ కభీ గమ్’ సినిమాలో ఓ పాటలో కాజోల్ను చూడండి.. లేదా ‘చాందినీ’లో శ్రీదేవిని చూడండి. వారు ఎలాంటి స్కిన్ షో చేయకుండా చీరల్లోనే అద్భుతంగా కనిపించారు. ‘ఆరాధన’ సినిమాలో మా అత్త షర్మిలా ఠాగూర్ తల నుంచి కాలి వరకు బట్టలు కప్పుకునే ఉంటారు. అయినా ఆ పాట ఎంత సెన్సేషన్ అయ్యిందో అందరికీ తెలుసు’’ అని కరీనా పేర్కొన్నారు.
