చరణ్ నటన మాస్టర్‌క్లాస్.. నన్ను ఇన్‌స్పైర్ చేశావ్ అన్నా: 'పెద్ది'పై వరుణ్ తేజ్ ఎమోషనల్ రివ్యూ

మెగా పవర్ స్టార్ రామ్ చరణ్, సంచలన దర్శకుడు బుచ్చిబాబు సానా దర్శకత్వంలో వచ్చిన 'పెద్ది' చిత్రం బాక్సాఫీస్ వద్ద భారీ విజయాన్ని అందుకుని విజయవంతంగా ప్రదర్శితమవుతోంది. ఈ సినిమాపై సినీ ప్రముఖుల నుంచి ప్రశంసలు వెల్లువెత్తుతున్నాయి. తాజాగా ఈ చిత్రంపై మెగా ప్రిన్స్ వరుణ్ తేజ్, సోషల్ మీడియా వేదికగా తన అభిప్రాయాన్ని పంచుకున్నారు. చిత్ర బృందాన్ని అభినందిస్తూ, ముఖ్యంగా తన సోదరుడు రామ్ చరణ్ నటనపై ఆయన చేసిన వ్యాఖ్యలు అందరి దృష్టినీ ఆకర్షిస్తున్నాయి.

కొన్ని సినిమాలు మాత్రమే మనసును బలంగా తాకుతాయని, 'పెద్ది' తనను మానసికంగా ఎంతో కదిలించిందని వరుణ్ తేజ్ తన పోస్టులో పేర్కొన్నారు. జీవితంలో ఎన్ని కష్టాలు ఎదురైనా, ఎన్నిసార్లు కిందపడినా తిరిగి నిలబడాలనే స్ఫూర్తిదాయకమైన సందేశం ఈ సినిమాలో తనకు బాగా నచ్చిందని వివరించారు. దర్శకుడు బుచ్చిబాబు సానా ఒక బలమైన కథను ఎంతో నమ్మకంతో, అద్భుతమైన ప్రతిభతో తెరకెక్కించారని ప్రశంసించారు. అంతేకాకుండా, సినిమాలో నటించిన ప్రతి ఒక్కరూ తమ పాత్రలకు ప్రాణం పోశారని కొనియాడారు. ముఖ్యంగా సీనియర్ నటుడు జగపతిబాబు, కన్నడ సూపర్ స్టార్ శివరాజ్ కుమార్ (శివన్న) నటన అద్భుతంగా ఉందని ప్రత్యేకంగా ప్రస్తావించారు.

ఇక, తన అన్న రామ్ చరణ్ నటన గురించి వరుణ్ తేజ్ భావోద్వేగభరితంగా స్పందించారు. "చరణ్ అన్నా, నీ నటన చూశాక నాకు మాటలు రావడం లేదు. 'పెద్ది' పాత్రలోకి నువ్వు పరకాయ ప్రవేశం చేసిన తీరు అమోఘం. ఆ పాత్రను సజీవంగా మలిచి, ప్రేక్షకులను కథలో లీనమయ్యేలా చేయడం నిజంగా ఒక మాస్టర్‌క్లాస్" అని వరుణ్ కొనియాడారు. ఒక నటుడిగా తనను చరణ్ మరోసారి ఎంతగానో ఇన్‌స్పైర్ చేశాడని, అందుకు ధన్యవాదాలని చెబుతూ ఎమోషనల్ అయ్యారు.

ప్రస్తుతం 'పెద్ది' చిత్రంపై, రామ్ చరణ్ నటనపై వరుణ్ తేజ్ చేసిన ఈ ట్వీట్ సోషల్ మీడియాలో వైరల్‌గా మారింది. అన్నయ్య సినిమా విజయంపై తమ్ముడి స్పందన మెగా అభిమానులను ఆకట్టుకుంటోంది.