టీమ్‌ఇండియా టీ20 కెప్టెన్‌గా శ్రేయస్ అయ్యర్.. సూర్యకుమార్‌పై వేటు!

భారత టీ20 క్రికెట్‌లో ఒక సరికొత్త అధ్యాయం మొదలైంది. గత కొన్ని రోజులుగా టీ20 కెప్టెన్సీపై సాగుతున్న ఉత్కంఠకు తెరదించుతూ ముంబైలోని బీసీసీఐ ప్రధాన కార్యాలయం శనివారం ఒక సంచలన నిర్ణయాన్ని ప్రకటించింది. ఫామ్ లేమితో ఇబ్బంది పడుతున్న సూర్యకుమార్ యాదవ్ స్థానంలో.. స్టార్ బ్యాటర్ శ్రేయస్ అయ్యర్‌ను భారత సరికొత్త టీ20 కెప్టెన్‌గా నియమిస్తూ సెలెక్టర్లు నిర్ణయం తీసుకున్నారు.

ఈ ఏడాది జూన్ 26 నుంచి జరగబోయే ఐర్లాండ్, ఇంగ్లాండ్ పర్యటనల నుంచే శ్రేయస్ అయ్యర్ సారథిగా బాధ్యతలు చేపట్టనున్నాడు. రాబోయే లాస్ ఏంజిల్స్ ఒలింపిక్స్ (2028), అలాగే ఆస్ట్రేలియా, న్యూజిలాండ్‌లలో జరిగే 2028 టీ20 ప్రపంచకప్‌ను దృష్టిలో ఉంచుకుని భవిష్యత్తు ప్రణాళికల్లో భాగంగా బోర్డు ఈ ముందడుగు వేసింది. గతేడాది మార్చిలో స్వదేశంలో జరిగిన టీ20 వరల్డ్‌కప్ టైటిల్ గెలవడంలో సూర్యకుమార్ కీలక పాత్ర పోషించినప్పటికీ ఆ తర్వాత అతడి వయసు (సెప్టెంబర్‌లో 36 ఏళ్లు వస్తాయి), ఫామ్ కోల్పోవడం బోర్డును కొత్త కెప్టెన్ వైపు చూసేలా చేశాయి.

ఐపీఎల్ 2026లో ముంబై ఇండియన్స్ తరఫున ఆడిన సూర్యకుమార్ యాదవ్ 13 ఇన్నింగ్స్‌లలో కేవలం 20.76 సగటుతో 270 పరుగులు మాత్రమే చేసి తీవ్రంగా నిరాశపరిచాడు. ఈ రేసులో హార్దిక్ పాండ్యా పేరు కూడా వినిపించినప్పటికీ.. ఐపీఎల్‌లో కోల్‌కతా నైట్ రైడర్స్‌ను 2024లో ఛాంపియన్‌గా నిలపడం, అలాగే ఢిల్లీ, పంజాబ్ జట్లను ఫైనల్స్‌కు చేర్చడంలో శ్రేయస్ చూపించిన అద్భుతమైన కెప్టెన్సీ నైపుణ్యాలు అతడికి ప్లస్ పాయింట్‌గా మారాయి. డ్రెస్సింగ్ రూమ్‌లో అందరి మద్దతు ఉండటంతో 31 ఏళ్ల అయ్యర్‌ వైపే సెలెక్టర్లు మొగ్గు చూపారు.

భారత క్రికెట్‌లో ఐసీసీ ట్రోఫీ గెలిచిన వెంటనే కెప్టెన్‌ను మార్చడం ఇది వరుసగా రెండోసారి కావడం గమనార్హం. గతేడాది 2025 మార్చిలో రోహిత్ శర్మ నేతృత్వంలో భారత్ ఛాంపియన్స్ ట్రోఫీ గెలిచిన కొద్ది రోజులకే.. వన్డే కెప్టెన్సీ బాధ్యతలను శుభ్‌మన్ గిల్‌కు అప్పగించారు. ఇప్పుడు సూర్యకుమార్ స్థానంలో శ్రేయస్ అయ్యర్ భారత టీ20 జట్టుకు 15వ కెప్టెన్‌గా బాధ్యతలు అందుకుని టీమిండియాను విజయపథంలో నడిపించేందుకు సిద్ధమవుతున్నాడు.