టెక్ రంగంలో ఉద్యోగాల కోత.. కానీ ఆ ఒక్క జాబ్‌కు మాత్రం 729 శాతం పెరిగిన డిమాండ్!

ప్రస్తుతం అంతర్జాతీయ సాంకేతిక (టెక్) రంగంలో తీవ్రమైన ఉద్యోగాల కోతలు నడుస్తున్నాయి. కానీ, ఈ గండం నుంచి ఐటీ ఉద్యోగులకు ఉపశమనం కలిగిస్తూ 'ఫార్వర్డ్-డిప్లాయ్డ్ ఇంజనీర్' (FDE) అనే ఒకే ఒక్క ఇంజనీరింగ్ రోల్ మాత్రం రికార్డు స్థాయిలో దూసుకుపోతోంది. టెక్ పరిశ్రమలో మిగిలిన విభాగాలన్నీ లేఆఫ్స్‌తో కుదేలవుతుంటే, ఎఫ్‌డీఈ ఉద్యోగ ప్రకటనలు కేవలం ఏడాది కాలంలోనే ఏకంగా 729 శాతం పెరిగాయి. 

ఈ రోల్‌లో చేరేవారికి కంపెనీలు ఏడాదికి 1,70,000 డాలర్ల నుంచి 2,00,000 డాలర్ల (దాదాపు  రూ. 1.4 కోట్ల నుంచి రూ. 1.6 కోట్ల పైమాటే) వరకు భారీ ప్యాకేజీలను ఆఫర్ చేస్తున్నాయి. ప్రముఖ జాబ్ పోర్టల్ 'ఇండీడ్' (Indeed) డేటా ప్రకారం.. ఏప్రిల్ 2025లో కేవలం 643గా ఉన్న ఎఫ్‌డీఈ జాబ్ లిస్టింగ్స్, ఏప్రిల్ 2026 నాటికి ఏకంగా 5,330కి చేరాయి. ప్రస్తుతం ఆంత్రోపిక్, ఓపెన్ఏఐ, స్ట్రైప్, గూగుల్ క్లౌడ్, పలాంటిర్ వంటి దిగ్గజాలతో పాటు మెకిన్సే సంస్థకు చెందిన ఏఐ విభాగం 'క్వాంటమ్‌బ్లాక్' కూడా ఈ పొజిషన్ల కోసం భారీగా నియామకాలు జరుపుతోంది.

ఈ కొత్త ట్రెండ్ ఒకవైపు ఉంటే, మిగిలిన టెక్ రంగంలో పరిస్థితి అత్యంత ఘోరంగా ఉంది. 'Layoffs.fyi' గణాంకాల ప్రకారం ఈ ఏడాది 150 కి పైగా కంపెనీలలో 1,15,000 మందికి పైగా ఉద్యోగాలు కోల్పోయారు. కాగా 'ట్రూఅప్' (Trueup) సంస్థ ఈ సంఖ్యను 1,48,000 గా పేర్కొంది. ప్రధానంగా మెటా సంస్థ 8,000 మందిని, సిస్కో 4,000, ఇంటుఇట్ 3,000, క్లౌడ్‌ఫ్లేర్ 1,100, స్నాప్ 1,000, కాయిన్‌బేస్ 700 మంది ఉద్యోగులను తొలగించాయి. పేపాల్ (PayPal) రాబోయే కొన్ని సంవత్సరాల్లో దాదాపు 4,800 మందిని తగ్గించుకోనుంది. లింక్డ్‌ఇన్, విక్స్, గ్రూపన్, వెబ్‌ఫ్లో, క్లిక్‌అప్ మరియు అమెజాన్ వంటి ప్రముఖ సంస్థలు కూడా ఈ లేఆఫ్స్ బాటలోనే నడుస్తున్నాయి. గతంలో మితిమీరిన నియామకాలు చేపట్టడం, మార్కెట్ వాటా తగ్గడం మరియు మెటావర్స్ వైఫల్యాల వల్లే ఈ కోతలు జరుగుతున్నాయని నివేదికలు చెబుతున్నాయి.

అసలు ఈ 'ఫార్వర్డ్-డిప్లాయ్డ్ ఇంజనీర్' (FDE) ఏం చేస్తారంటే.. వీరు ఆర్టిఫిషియల్ ఇంటెలిజెన్స్ (AI) టూల్స్‌కు, క్లయింట్ (కస్టమర్) వ్యాపారానికి మధ్య వారధిగా పనిచేస్తారు. ఏఐ సాఫ్ట్‌వేర్‌ను కస్టమర్ల దైనందిన వ్యాపార అవసరాలకు అనుగుణంగా మార్చడం (Customize చేయడం), వారి వర్క్‌ఫ్లోలో దానిని విజయవంతంగా అమలు చేయడం, లాంచ్ తర్వాత అది సరిగ్గా పనిచేసేలా చూసుకోవడం వీరి ముఖ్య బాధ్యత. ఈ సరికొత్త వ్యూహాత్మక రోల్‌ను మొదట 'పలాంటిర్' (Palantir) సంస్థ ప్రవేశపెట్టగా, ప్రస్తుతం ఐటీ రంగంలోని మిగిలిన కంపెనీలన్నీ ఇదే ఫార్ములాను ఫాలో అవుతున్నాయి. ఏఐ విస్తరణకు ఎఫ్‌డీఈలు అత్యంత కీలకమైన వనరులని బాక్స్ సీఈవో ఆరోన్ లెవీ పేర్కొనగా, క్లయింట్ల నుంచి వస్తున్న విపరీతమైన డిమాండ్ వల్లే తాము ఎఫ్‌డీఈ నియామకాలను పెంచుతున్నట్లు గూగుల్ క్లౌడ్ సీఈవో థామస్ కురియన్ స్పష్టం చేశారు.

ఇప్పుడు కేవలం ఐటీ లాబ్‌లే కాకుండా కన్సల్టింగ్ కంపెనీలు కూడా సిలికాన్ వ్యాలీలోని సరికొత్త ఏఐ టూల్స్‌ను మార్కెట్ చేయడానికి ఇటువంటి సాంకేతిక నిపుణుల కోసం వెతుకుతున్నాయి. మెకిన్సే అనుబంధ క్వాంటమ్‌బ్లాక్‌లోని 'ప్రిన్సిపల్ ఫార్వర్డ్ డిప్లాయ్‌మెంట్ ఇంజనీర్' పోస్టుల కోసం కంప్యూటర్ సైన్స్ లేదా మెషీన్ లెర్నింగ్‌లో డిగ్రీతో పాటు కనీసం 8 ఏళ్ల సాఫ్ట్‌వేర్ అనుభవం అడుగుతున్నారు. తమకు అటు గొప్ప కన్సల్టెంట్‌గా, ఇటు అద్భుతమైన టెక్నాలజిస్ట్‌గా రాణించగల సత్తా ఉన్నవారే కావాలని క్వాంటమ్‌బ్లాక్ కో-లీడర్ అలెక్స్ సింగ్లా తెలిపారు. దీన్నిబట్టి కంపెనీలు ఉద్యోగాల కోతలను ఆపలేదని, కాకపోతే వారు భవిష్యత్తులో ఎవరిని నియమించుకోవాలనే విషయంలో మరింత కచ్చితంగా (Pickyగా) వ్యవహరిస్తున్నారని స్పష్టమవుతోంది. పెద్ద పెద్ద ఫార్చ్యూన్ 500 కంపెనీల వ్యాపారాల్లోకి ఏఐని విజయవంతంగా జొప్పించగల నైపుణ్యం ఉన్నవారికి ఇప్పుడు మార్కెట్‌లో చుక్కల జీతాలు లభిస్తున్నాయి.