'ఫరెవర్ మై హీరో'.. నాన్నకు మహేశ్ బాబు భావోద్వేగ నివాళి

సూపర్ స్టార్ కృష్ణ జయంతి సందర్భంగా ఆయన కుమారుడు, స్టార్ హీరో మహేశ్ బాబు భావోద్వేగానికి గురయ్యారు. తండ్రిని గుర్తుచేసుకుంటూ సోషల్ మీడియాలో ఓ హృదయపూర్వక పోస్ట్ పెట్టారు. ఈ పోస్ట్ ప్రస్తుతం అభిమానుల మనసులను కదిలిస్తోంది.

నేడు (మే 31) సూపర్ స్టార్ కృష్ణ జయంతి. ఈ సందర్భంగా మహేశ్ బాబు తన అధికారిక సోషల్ మీడియా ఖాతా 'ఎక్స్' (ట్విట్ట‌ర్‌)లో 'ఫరెవర్ మై హీరో... హ్యాపీ బర్త్ డే నాన్న" అంటూ ఒక సందేశాన్ని పంచుకున్నారు. ఈ చిన్న వాక్యంలోనే తండ్రిపై తనకున్న అపారమైన ప్రేమను, గౌరవాన్ని మహేశ్ వ్యక్తం చేశారు. కృష్ణ భౌతికంగా దూరమైనా, ఆయన జ్ఞాపకాలు తనతో ఎప్పటికీ ఉంటాయని, తన దృష్టిలో ఆయనే నిజమైన హీరో అని మహేశ్ చెప్పకనే చెప్పారు.

తెలుగు సినీ పరిశ్రమలో కృష్ణ-మహేశ్‌బాబులది ప్రత్యేకమైన బంధం. తండ్రీకొడుకుల అనుబంధానికి వారిద్దరూ నిలువుటద్దంలా నిలిచారు. కృష్ణ మరణానంతరం ప్రతి సందర్భంలోనూ మహేశ్ ఆయన్ను స్మరించుకుంటూనే ఉంటారు.

ప్రస్తుతం మహేశ్ పెట్టిన ఈ పోస్ట్ సోషల్ మీడియాలో వైరల్‌ అవుతోంది. ఇది చూసిన అభిమానులు, నెటిజన్లు సైతం భావోద్వేగానికి గురవుతున్నారు. సూపర్ స్టార్ కృష్ణను గుర్తుచేసుకుంటూ కామెంట్లు పెడుతూ తమ అభిమానాన్ని చాటుకుంటున్నారు.