రేపు జైసల్మేర్‌ను సందర్శించనున్న ట్రంప్ చిన్న కుమార్తె టిఫానీ

అమెరికా అధ్యక్షుడు డొనాల్డ్ ట్రంప్ చిన్న కుమార్తె టిఫానీ ట్రంప్, ఆమె భర్త మైఖేల్ బౌలోస్‌తో కలిసి రాజస్థాన్‌లోని జైసల్మేర్‌లో పర్యటించనున్నారు. ఆదివారం వారు ప్రత్యేక చార్టర్డ్ విమానంలో జైసల్మేర్ చేరుకోనున్నారు. ఈ పర్యటన నేపథ్యంలో అధికారులు నగరంలో కట్టుదిట్టమైన భద్రతా ఏర్పాట్లు చేశారు. జైసల్మేర్ భారత్-పాకిస్థాన్ సరిహద్దుకు సమీపంలో ఉండటంతో భద్రతపై ప్రత్యేక దృష్టి సారించారు.

భారత్‌లో ప్రైవేట్ పర్యటనలో భాగంగా టిఫానీ దంపతులు ఇప్పటికే దేశ రాజధాని ఢిల్లీ, ఆగ్రాలను సందర్శించారు. శుక్రవారం ఢిల్లీలోని స్వామినారాయణ్ అక్షర్‌ధామ్ ఆలయాన్ని సందర్శించిన టిఫానీ, ఆలయ వైభవాన్ని ప్రశంసిస్తూ సోషల్ మీడియా ప్లాట్‌ఫామ్ 'ఎక్స్'లో ఫొటోలు పంచుకున్నారు. శనివారం ఆగ్రాలోని ప్రపంచ ప్రసిద్ధ తాజ్ మహల్‌ను సందర్శించి ఫొటోలు దిగారు.

జైసల్మేర్ పర్యటనలో భాగంగా వారు విలాసవంతమైన సూర్యగఢ్ హోటల్‌లో బస చేయనున్నారు. ఈ సందర్భంగా సోనార్ కోట, పట్వోన్ కీ హవేలీ, గడిసర్ సరస్సు వంటి చారిత్రక ప్రదేశాలను వారు సందర్శించే అవకాశం ఉంది. సోమవారం వారు జైసల్మేర్ నుంచి తిరుగు ప్రయాణం కానున్నారు.

టిఫానీ పర్యటనతో జైసల్మేర్‌కు అంతర్జాతీయంగా మరింత గుర్తింపు లభించి పర్యాటక రంగం పుంజుకుంటుందని స్థానిక హోటల్ నిర్వాహకులు, టూర్ గైడ్లు ఆశాభావం వ్యక్తం చేస్తున్నారు. కాగా, ట్రంప్ కుటుంబ సభ్యులు జైసల్మేర్‌కు రావడం ఇది మొదటిసారి కాదు. 2018 నవంబర్‌లో ట్రంప్ కుమార్తె ఇవాంకా భర్త జారెడ్ కుష్నర్, ఇదే సూర్యగఢ్ హోటల్‌లో జరిగిన ఓ వివాహ వేడుకకు హాజరయ్యారు.