అతను ఎలాంటి సవాలుకైనా సిద్ధం.. వైభవ్‌కు త్వరలోనే టీమిండియా పిలుపు: కుమార్ సంగక్కర

ఐపీఎల్ 2026 టైటిల్ రేసు నుంచి రాజస్థాన్ రాయల్స్ నిష్క్రమించినప్పటికీ, ఆ జట్టు యువ సంచలనం వైభవ్ సూర్యవంశీపై ప్రశంసల వర్షం కురుస్తోంది. భారత జట్టులో చోటు సంపాదించడానికి వైభవ్ సిద్ధంగా ఉన్నాడని రాజస్థాన్ హెడ్ కోచ్, శ్రీలంక దిగ్గజం కుమార్ సంగక్కర పూర్తి విశ్వాసం వ్యక్తం చేశాడు. క్వాలిఫయర్ 2లో గుజరాత్ టైటాన్స్‌తో జరిగిన మ్యాచ్‌లో ఓటమి అనంతరం మీడియాతో మాట్లాడారు.

ప్రస్తుతం క్రికెట్ ప్రపంచంలో హాట్ టాపిక్‌గా మారిన "వైభవ్ సూర్యవంశీ టీమిండియా అరంగేట్రానికి సిద్ధంగా ఉన్నాడా?" అనే ప్రశ్నకు సంగక్కర స్పష్టమైన సమాధానమిచ్చాడు. "ఒక ఆటగాడు అంతర్జాతీయ స్థాయికి సిద్ధంగా ఉన్నాడో లేదో, అతనికి ఆ అవకాశం ఇచ్చే వరకు ఎవరూ కచ్చితంగా చెప్పలేరు. కానీ, వైభవ్ విషయంలో నా సమాధానం అవుననే. ఈ ఐపీఎల్‌లో ప్రపంచంలోని అత్యుత్తమ బౌలర్లను అతను ఎదుర్కొన్న తీరు చూశాక, ఎలాంటి సవాలునైనా స్వీకరించడానికి అతను సిద్ధంగా ఉన్నాడని నేను నమ్ముతున్నాను. త్వరలోనే అతనికి టీమిండియా నుంచి పిలుపు వస్తుందన్న నమ్మకం నాకుంది" అని సంగక్కర పేర్కొన్నాడు.

ఈ సీజన్‌లో ఓపెనర్‌గా వైభవ్ అద్భుతమైన పరిపక్వత చూపించాడని, జట్టు బాధ్యతలను తన భుజాలపై మోశాడని సంగక్కర కొనియాడాడు. సోషల్ మీడియా నెగటివ్ ప్రభావం నుంచి టీనేజ్ ఆటగాడైన వైభవ్‌ను ఎలా కాపాడుతున్నారని అడగ్గా, అందుకు తగిన వ్యూహం ఉందన్నాడు. "అతని చుట్టూ మాకు స్పష్టమైన ప్రణాళిక ఉంది. అతని ఆలోచనలను అనవసర విషయాలతో నింపేయాలని మేము కోరుకోం. అతను అన్ని టీమ్ మీటింగ్‌లకు వస్తాడు, తన అభిప్రాయాలు పంచుకుంటాడు, చాలా హోంవర్క్ చేస్తాడు. బౌలర్ల వీడియోలు చూసి బాగా సిద్ధమవుతాడు. స్పష్టమైన ఆలోచన, ధైర్యంతో కూడిన బ్యాటింగ్.. మేము అతని నుంచి కోరుకునేది ఇదే" అని తెలిపాడు.

ఐపీఎల్ 2026 సీజన్‌ను వైభవ్ సూర్యవంశీ అద్భుతంగా ముగించాడు. 16 మ్యాచ్‌లలో మొత్తం 776 పరుగులు చేసి, ప్రస్తుతం ఆరెంజ్ క్యాప్ హోల్డర్‌గా ఉన్నాడు. అయితే, ఫైనల్‌లో తలపడనున్న గుజరాత్ టైటాన్స్ ఆటగాళ్లు శుభ్‌మన్ గిల్ (722), సాయి సుదర్శన్ (710) అతడిని అధిగమించేందుకు ఇంకా అవకాశం ఉంది.