మే 31న ఆకాశంలో అరుదైన దృశ్యం.. హైదరాబాద్‌లోనూ చూడొచ్చు!

హైదరాబాద్ నగరవాసులతో పాటు దేశవ్యాప్తంగా ఖగోళ ప్రియులు మే 31న ఒక అరుదైన దృశ్యాన్ని వీక్షించబోతున్నారు. ఆ రోజు ఆకాశంలో 'బ్లూ మైక్రోమూన్' కనువిందు చేయనుంది. ఒకే నెలలో రెండోసారి పౌర్ణమి రావడం, అదే సమయంలో ఈ ఏడాదిలోనే చంద్రుడు అత్యంత చిన్నగా కనిపించనుండటం దీని ప్రత్యేకత.

2026 మే నెలలో రెండు పౌర్ణములు సంభవిస్తున్నాయి. మొదటి పౌర్ణమి మే 1న రాగా, రెండోది మే 31న రానుంది. సాధారణంగా ఒకే క్యాలెండర్ నెలలో రెండోసారి వచ్చే పౌర్ణమిని 'బ్లూ మూన్' అని పిలుస్తారు. అలాగే, మే 31న చంద్రుడు భూమికి అత్యంత దూరంలో (అపోజీ) ఉండనున్నందున దీనిని 'మైక్రోమూన్' అని కూడా అంటున్నారు. ఇలా బ్లూ మూన్, మైక్రోమూన్ రెండూ ఒకేసారి రావడం చాలా అరుదు.

ఈ బ్లూ మైక్రోమూన్ సాధారణ పౌర్ణమి చంద్రుడి కంటే 6-7 శాతం చిన్నగా, కొంచెం తక్కువ ప్రకాశవంతంగా కనిపిస్తుంది. అయితే, పేరులో 'బ్లూ' ఉన్నప్పటికీ చంద్రుడు నీలం రంగులో కనిపించడు. ఇది కేవలం ఒక ఖగోళ నామకరణం మాత్రమేనని నిపుణులు స్పష్టం చేస్తున్నారు.

హైదరాబాద్‌లో మే 31న సాయంత్రం 6:30 నుంచి 7:30 గంటల మధ్య తూర్పు వైపు ఆకాశంలో దీన్ని స్పష్టంగా చూడవచ్చు. వాతావరణం అనుకూలిస్తే ఎలాంటి ప్రత్యేక పరికరాలు లేకుండానే కళ్లతో ఈ అద్భుతాన్ని వీక్షించవచ్చు. ఈ సమయంలో చంద్రుడు స్కార్పియస్ రాశిలోని ప్రకాశవంతమైన అంటారిస్ నక్షత్రానికి సమీపంలో కనిపిస్తాడు.