పినరయి విజయన్ ఇంటి వద్ద తీవ్ర ఉద్రిక్తత... ఈడీ అధికారులపై సీపీఎం కార్యకర్తల దాడి

కేరళలో రాజకీయ వాతావరణం ఒక్కసారిగా వేడెక్కింది. మాజీ ముఖ్యమంత్రి, సీపీఎం సీనియర్ నేత పినరయి విజయన్ అద్దెకు ఉంటున్న నివాసం వద్ద బుధవారం తీవ్ర ఉద్రిక్తత చోటుచేసుకుంది. ఎన్‌ఫోర్స్‌మెంట్ డైరెక్టరేట్ (ఈడీ) అధికారులు సోదాలు ముగించుకుని వెళుతున్న సమయంలో వారి వాహనాలపై సీపీఎం కార్యకర్తలు, సానుభూతిపరులు దాడికి పాల్పడ్డారు. ఈ ఘటనలో మూడు వాహనాలు ధ్వంసం కాగా, పలువురికి గాయాలయ్యాయి.

సీఎంఆర్‌ఎల్-ఎక్సాలాజిక్ ఆర్థిక లావాదేవీల కేసుకు సంబంధించి ఈడీ అధికారులు విజయన్ నివాసంలో సోదాలు నిర్వహించారు. సోదాలు ముగిశాక అధికారులు తమ కాన్వాయ్‌లో బయలుదేరగా, అప్పటికే అక్కడ గుమిగూడిన సీపీఎం కార్యకర్తలు వారిని అడ్డగించారు. ఆగ్రహంతో కర్రలు, రాళ్లతో వాహనాలపై దాడి చేసి అద్దాలు పగలగొట్టారు.

ఈ దాడిలో ఒక డ్రైవర్‌ కంటికి గాజు పెంకులు తగలడంతో తీవ్ర గాయమైంది. మరో డ్రైవర్‌తో పాటు, కొందరు కేంద్ర భద్రతా సిబ్బంది, పోలీసులు కూడా స్వల్పంగా గాయపడ్డారు. సీపీఎం సీనియర్ నాయకులు అక్కడే ఉన్నప్పటికీ ఈ దాడి జరగడం గమనార్హం.

ఘటన జరిగినప్పుడు పోలీసులు మొదట ప్రేక్షకపాత్ర వహించారనే విమర్శలు వస్తున్నాయి. ఈడీ అధికారులు ఎలాగోలా అక్కడి నుంచి తప్పించుకుని, సమీపంలోని పోలీస్ స్టేషన్‌కు చేరుకుని ఘటనపై ఫిర్యాదు చేశారు. అనంతరం పోలీసులు రంగంలోకి దిగి దాడికి పాల్పడిన వారిని అరెస్ట్ చేయడం ప్రారంభించారు. అరెస్టు నుంచి తప్పించుకోవడానికి కొందరు కార్యకర్తలు సమీపంలోని పార్టీ కార్యాలయంలోకి పరుగులు తీయగా, పోలీసులు ఆ కార్యాలయాన్ని చుట్టుముట్టారు. ఈ ఘటనతో రాష్ట్రంలో రాజకీయ ఉద్రిక్తతలు మరింత పెరిగాయి.