ప్రమాదం కంటే దారుణం.. గాయపడ్డ వారిని వదిలేసి మేకలను ఎత్తుకెళ్లిన జనం.. ఇదిగో వీడియో!

ఉత్తరప్రదేశ్‌లోని కౌశాంబి జిల్లాలో ఒకే ఘటనలో రెండు విపరీతమైన దృశ్యాలు ఆవిష్కృతమయ్యాయి. ఒకటి ఘోర రోడ్డు ప్రమాదం కాగా, మరొకటి మానవత్వం సిగ్గుతో తలదించుకునే సంఘటన. సుమారు 200కి పైగా మేకలతో వెళుతున్న ఓ లారీ అదుపుతప్పి బోల్తా పడింది. ఈ దుర్ఘటనలో నలుగురు వ్యక్తులు తీవ్రంగా గాయపడగా, 20కి పైగా మేకలు మృతి చెందాయి. అయితే, ప్రమాదస్థలంలో గాయపడిన వారికి సహాయం అందించాల్సింది పోయి, కొందరు స్థానికులు మేకలను ఎత్తుకెళ్లడం తీవ్ర విమర్శలకు దారితీసింది.

వివరాల్లోకి వెళితే.. కాన్పూర్ నుంచి ప్రయాగ్‌రాజ్‌కు మేకలతో వెళ్తున్న ఓ లారీ ఆదివారం మధ్యాహ్నం 2:30 గంటల సమయంలో కోఖ్‌రాజ్ పోలీస్ స్టేషన్ పరిధిలోని అండవా టెధి మలుపు వద్ద ప్రమాదానికి గురైంది. డ్రైవర్ నియంత్రణ కోల్పోవడంతో భారీ లోడ్‌తో ఉన్న లారీ రోడ్డు పక్కన బోల్తా పడింది. ఈ ఘటనతో లారీలో ఉన్నవారు గాయపడగా, వందలాది మేకలు రోడ్డుపై చెల్లాచెదురుగా పడిపోయాయి. వాటిలో కొన్ని అక్కడికక్కడే చనిపోగా, మరికొన్ని తీవ్రంగా గాయపడ్డాయి.

ప్రమాదం జరిగిన వెంటనే చుట్టుపక్కల ప్రజలు పెద్ద సంఖ్యలో అక్కడికి చేరుకున్నారు. కానీ, వారిలో చాలామంది క్షతగాత్రులను పట్టించుకోకుండా లారీలోని మేకలను పట్టుకొని ఎత్తుకెళ్లడం ప్రారంభించారు. ఒకవైపు బాధితులు నొప్పితో విలవిల్లాడుతుంటే, మరోవైపు కొందరు వ్యక్తులు మేకలను భుజాలపై వేసుకుని తీసుకెళ్తున్న దృశ్యాలు అక్కడున్న వారిని కలిచివేశాయి. ఈ ఘటనకు సంబంధించిన వీడియోలు సోషల్ మీడియాలో వైరల్ కావడంతో ప్రజల తీరుపై నెటిజన్ల నుంచి తీవ్ర ఆగ్రహం వ్యక్తమవుతోంది. అత్యవసర సమయంలో మానవత్వం లేకుండా ప్రవర్తించడం దారుణమంటూ విమర్శలు వెల్లువెత్తాయి.

సమాచారం అందుకున్న పోలీసులు వెంటనే సంఘటనా స్థలానికి చేరుకుని, గాయపడిన వారిని అంబులెన్సులో సమీప ఆసుపత్రికి తరలించారు. అనంతరం క్రేన్ సహాయంతో లారీని తొలగించి, రహదారిపై ట్రాఫిక్‌ను పునరుద్ధరించారు. ఈ ప్రమాదంలో నలుగురు తీవ్రంగా గాయపడ్డారని, అనేక మేకలు చనిపోయాయని స్టేషన్ హౌస్ ఆఫీసర్ చంద్రభూషణ్ మౌర్య ధ్రువీకరించారు. వైరల్ అవుతున్న వీడియోల ఆధారంగా మేకలను దొంగిలించిన వారిని గుర్తిస్తున్నామని, వారిపై కఠిన చర్యలు తీసుకుంటామని ఆయన తెలిపారు.