కూతురితో కలిసి ఆ సినిమా చూస్తే కన్నీళ్లు ఆపుకోవ‌డం చాలా క‌ష్టం: ప్రియాంకా చోప్రా భ‌ర్త నిక్ జోన‌స్

ప్రముఖ పాప్ సింగర్, న‌టి ప్రియాంకా చోప్రా భ‌ర్త నిక్ జోనస్ తన వ్యక్తిగత జీవితానికి సంబంధించిన ఒక ఆసక్తికరమైన విషయాన్ని పంచుకున్నారు. ఒకానొక డిస్నీ సినిమా చూస్తున్నప్పుడు తాను తీవ్రమైన భావోద్వేగానికి గురై కన్నీళ్లు పెట్టుకుంటానని ఆయన వెల్లడించారు. మరీ ముఖ్యంగా తన నాలుగేళ్ల కుమార్తె మాలతితో కలిసి ఆ సినిమా చూస్తున్నప్పుడు ఈ అనుభూతి మరింత ప్రత్యేకంగా ఉంటుందని తెలిపారు.

ఇటీవల న్యూయార్క్‌లో తన కొత్త చిత్రం 'పవర్ బల్లాడ్' ప్రమోషన్ల కోసం నిర్వహించిన ఒక ప్యానెల్ డిస్కషన్‌లో నిక్ పాల్గొన్నారు. ఈ కార్యక్రమంలో సహనటుడు పాల్ రడ్, దర్శకుడు జాన్ కార్నీ కూడా ఉన్నారు. ఈ సందర్భంగా హోస్ట్ అడిగిన ఒక ప్రశ్నకు నిక్ సమాధానమిస్తూ.. "నన్ను భావోద్వేగానికి గురిచేసే సినిమా ఏదైనా ఉందా అంటే అది 'ది లయన్ కింగ్'. ఈ రోజుల్లో ఆ సినిమాను నా కూతురితో కలిసి చూస్తున్నాను. చిన్నప్పుడు నా వ్యక్తిత్వాన్ని తీర్చిదిద్దిన కథలను ఇప్పుడు తనతో పంచుకోవడం చాలా ప్రత్యేకమైన అనుభూతినిస్తోంది" అని అన్నారు. 'పీపుల్' మ్యాగజైన్ ఈ వివరాలను తన కథనంలో ప్రచురించింది.

అంతేకాకుండా తాను నటించిన 'పవర్ బల్లాడ్' చిత్రంలో తండ్రీకూతుళ్ల మధ్య ఉండే కొన్ని సన్నివేశాలు కూడా తనను బాగా కదిలించాయని నిక్ తెలిపారు. విమానాల్లో ప్రయాణిస్తున్నప్పుడు సినిమాలు చూస్తూ కూడా తరచుగా ఏడుస్తానని ఆయన సరదాగా వ్యాఖ్యానించారు. నిక్ జోనస్, ప్రియాంక చోప్రా దంపతులకు 2022లో కుమార్తె మాలతి జన్మించిన విషయం తెలిసిందే.

ఇదిలా ఉంటే.. ఇటీవల ప్రియాంక చోప్రా కూడా ఓ పాడ్‌కాస్ట్‌లో మాట్లాడుతూ తమ కుమార్తె పెంపకం గురించి కొన్ని విషయాలు పంచుకున్నారు. "మాలతి ఎదుగుతున్న కొద్దీ, తనకంటూ కొంత ప్రైవసీ ఇచ్చేందుకు ప్రయత్నిస్తున్నాం. వీలైనంత వరకు తనకంటూ ఒక సాధారణ జీవితాన్ని అందించాలనుకుంటున్నాం. అదే సమయంలో ప్రజలు తన గురించి ఆసక్తిగా ఉంటారనే విషయం కూడా తనకు తెలియాలి. కానీ, దానివల్ల ఆమె భయపడకూడదు. తనకు ఎంపిక చేసుకునే స్వేచ్ఛ ఉండాలి" అని ప్రియాంక వివరించారు. ఈ సెలబ్రిటీ జంట తమ కుమార్తెకు మంచి పెంపకాన్ని అందిస్తూ, వ్యక్తిగత, వృత్తిగత జీవితాలను సమన్వయం చేసుకుంటున్న తీరు పలువురిని ఆకట్టుకుంటోంది.