'పెద్ది' సెన్సార్ పూర్తి... రన్‌టైమ్‌ కాస్త ఎక్కువే!

గ్లోబల్ స్టార్ రామ్ చరణ్, దర్శకుడు బుచ్చిబాబు సానా కాంబినేషన్‌లో వస్తున్న 'పెద్ది' సినిమాకు సంబంధించిన కీలక అప్‌డేట్ వచ్చింది. ఈ చిత్రం సెన్సార్ బోర్డు ప్రక్రియను పూర్తి చేసుకుని, విడుదలకు సిద్ధమైంది. సినిమాను వీక్షించిన సెన్సార్ సభ్యులు U/A 16+ సర్టిఫికెట్‌ను జారీ చేశారు.

అయితే, ఈ సినిమా నిడివి ప్రస్తుతం ఇండస్ట్రీ వర్గాల్లో ఆసక్తికర చర్చకు దారితీసింది. 'పెద్ది' మొత్తం 3 గంటల 9 నిమిషాల (189 నిమిషాలు) రన్‌టైమ్‌తో ప్రేక్షకుల ముందుకు రానుంది. సెన్సార్ బోర్డు కొన్ని చిన్న మార్పులను సూచించినప్పటికీ, చిత్ర యూనిట్ ఈ భారీ నిడివినే ఖరారు చేయడం విశేషం. కథపై ఉన్న నమ్మకంతోనే దర్శకుడు ఈ నిర్ణయం తీసుకున్నట్లు తెలుస్తోంది.

'ఉప్పెన' తర్వాత బుచ్చిబాబు దర్శకత్వం వహిస్తున్న ఈ చిత్రం ఒక స్పోర్ట్స్ డ్రామాగా తెరకెక్కుతోంది. ఇందులో రామ్ చరణ్ సరసన జాన్వీ కపూర్ 'అచ్చియమ్మ' అనే పాత్రలో నటిస్తోంది. ఇటీవల ముంబైలో జరిగిన ఓ గ్రాండ్ ఈవెంట్‌లో సినిమా ట్రైలర్‌ను విడుదల చేయగా, దీనికి మంచి స్పందన లభించింది.

ఈ చిత్రంలో కన్నడ స్టార్ శివ రాజ్ కుమార్, జగపతి బాబు, బోమన్ ఇరానీ, దివ్యేందు వంటి ప్రముఖ నటులు కీలక పాత్రలు పోషిస్తున్నారు. వృద్ధి సినిమాస్, ఐవీ ఎంటర్‌టైన్‌మెంట్ బ్యానర్లపై సినిమాను నిర్మిస్తున్నారు. ముందుగా ప్రకటించినట్లుగానే జూన్ 4న ఈ చిత్రం ప్రపంచవ్యాప్తంగా విడుదల కానుంది.