తార‌క్‌ పుట్టినరోజు కానుక.. ఈ నెల‌ 19 అర్ధరాత్రి 'ఎన్టీఆర్-ప్రశాంత్ నీల్' ఫస్ట్ గ్లింప్స్!

యంగ్ టైగర్ ఎన్టీఆర్, సంచలన దర్శకుడు ప్రశాంత్ నీల్ కాంబినేషన్‌లో రాబోతున్న భారీ చిత్రం కోసం అభిమానులు అత్యంత ఆసక్తిగా ఎదురుచూస్తున్నారు. ప్ర‌స్తుతం 'NTRNeel' (వ‌ర్కింగ్ టైటిల్‌)గా పిలుస్తున్న ఈ సినిమాపై అంచనాలు ఆకాశాన్ని అంటుతున్నాయి. ఈ క్రమంలో ఎన్టీఆర్ పుట్టినరోజు (మే 20) సందర్భంగా అభిమానులకు అదిరిపోయే కానుక ఇచ్చేందుకు చిత్రబృందం సిద్ధమైంది. 19వ తేదీ అర్ధరాత్రి ఈ సినిమా ఫస్ట్ గ్లింప్స్ (టీజర్)ను విడుదల చేయనున్నట్లు అధికారికంగా ప్రకటించింది.

ఈ మెగా ప్రాజెక్ట్ టీజర్‌ను కేవలం తెలుగులో మాత్రమే కాకుండా, దేశవ్యాప్తంగా ఐదు భాషల్లో విడుదల చేయనున్నారు. తెలుగుతో పాటు హిందీ, కన్నడ, తమిళం, మలయాళ భాషల్లో ఒకేసారి టీజర్‌ను రిలీజ్ చేసి, పాన్-ఇండియా స్థాయిలో ప్రకంపనలు సృష్టించేందుకు మేకర్స్ ప్లాన్ చేశారు. దీంతో ఈ సినిమాపై దేశవ్యాప్తంగా ఉన్న హైప్ మరో స్థాయికి చేరింది.

ఇటీవలే చిత్ర బృందం విడుదల చేసిన ఓ కొత్త స్టిల్ సోషల్ మీడియాలో వైరల్‌గా మారింది. ఎడారి మధ్యలో ఓ వ్యక్తి చేతిలో కర్ర పట్టుకుని నిలబడి ఉన్న ఈ పోస్టర్, సినిమా ప్రపంచం ఎలా ఉండబోతోందనే ఉత్కంఠను రేకెత్తించింది. "The calm before the ________. Rest you know what to fill in the blank." (________ముందు ప్రశాంతత... ఖాళీని మీరే పూరించండి) అనే ఆసక్తికరమైన క్యాప్షన్‌తో ఈ స్టిల్‌ను పంచుకున్నారు. దీంతో ప్రశాంత్ నీల్ సృష్టించబోయే కొత్త ప్రపంచంపై అభిమానులు రకరకాల అంచనాలతో సోషల్ మీడియాలో చర్చలు మొదలుపెట్టారు.

'NTRNeel' ప్రాజెక్ట్ ప్రకటించినప్పటి నుంచే దీనిపై భారీ అంచనాలు నెలకొన్నాయి. తెలుగు సినిమాలోని టాప్ హీరోల్లో ఒకరైన ఎన్టీఆర్, భారీ యాక్షన్ చిత్రాలకు కేరాఫ్ అడ్రస్‌గా నిలిచిన ప్రశాంత్ నీల్ కలయిక కావడంతో ఈ సినిమాపై అంచనాలు తారాస్థాయికి చేరాయి. మైత్రీ మూవీ మేకర్స్, ఎన్టీఆర్ ఆర్ట్స్ సంయుక్తంగా ఈ చిత్రాన్ని నిర్మిస్తున్నాయి. మే 19 అర్ధరాత్రి విడుదల కాబోయే ఫస్ట్ గ్లింప్స్, ఈ సినిమా స్థాయిని, కథా నేపథ్యాన్ని ప్రేక్షకులకు పరిచయం చేయనుంది. ఈ టీజర్ కోసం తార‌క్‌ అభిమానులు ఆస‌క్తిగా ఎదురుచూస్తున్నారు.