తమిళనాడులో ‘హార్స్ ట్రేడింగ్’ కలకలం.. కనిపించకుండా పోయిన ఏఎంఎంకే ఎమ్మెల్యే

తమిళనాడులో ప్రభుత్వ ఏర్పాటుపై నెలకొన్న రాజకీయ అనిశ్చితి మరింత తీవ్రమైంది. తమ పార్టీకి చెందిన ఏకైక ఎమ్మెల్యే కనిపించకుండా పోయారని, దీని వెనుక ‘హార్స్ ట్రేడింగ్’ (కొనుగోలు) జరిగి ఉండొచ్చని అమ్మ మక్కల్ మున్నేట్ర కజగం (ఏఎంఎంకే) ప్రధాన కార్యదర్శి టీటీవీ దినకరన్ సంచలన ఆరోపణలు చేశారు. శుక్రవారం ఆయన యాక్టింగ్ గవర్నర్ రాజేంద్ర విశ్వనాథ్ అర్లేకర్‌ను కలిసి ఈ విషయంపై ఫిర్యాదు చేశారు.

234 స్థానాలున్న తమిళనాడు అసెంబ్లీలో నటుడు సి. జోసెఫ్ విజయ్ నేతృత్వంలోని తమిళగ వెట్రి కజగం (టీవీకే) 108 సీట్లు గెలిచి అతిపెద్ద పార్టీగా అవతరించింది. అయితే ప్రభుత్వ ఏర్పాటుకు అవసరమైన 118 సీట్ల మ్యాజిక్ ఫిగర్‌కు దూరంగా నిలిచిపోయింది. కాంగ్రెస్, సీపీఐ, సీపీఎం మద్దతు ప్రకటించినా మెజారిటీ మార్కును అందుకోలేకపోయింది. ఈ క్రమంలో ప్రభుత్వ ఏర్పాటుకు అవకాశం ఇవ్వాలని విజయ్ ఇప్పటికే మూడుసార్లు గవర్నర్‌ను కలిశారు. అయితే, స్పష్టమైన మెజారిటీ లేకపోవడంతో గవర్నర్ ఇంకా ఎవరినీ ఆహ్వానించలేదు.

ఈ ప్రతిష్టంభన కొనసాగుతుండగా దినకరన్ శుక్రవారం రాత్రి గవర్నర్‌ను కలిసి, ఏఐఏడీఎంకేకు ప్రభుత్వం ఏర్పాటు చేసే హక్కు ఉందని ఓ లేఖ సమర్పించారు. అనంతరం మీడియాతో మాట్లాడుతూ, తమ ఎమ్మెల్యే కామరాజ్ అనుమానాస్పద స్థితిలో అదృశ్యమయ్యారని తెలిపారు. "మా ఎమ్మెల్యే కనిపించడం లేదు. ఫోన్‌లో కూడా అందుబాటులో లేరు. ఇది హార్స్ ట్రేడింగ్ పనే అని అనుమానిస్తున్నాం. దీనిపై తక్షణమే విచారణ జరపాలని గవర్నర్‌ను కోరాను" అని దినకరన్ వివరించారు. ఎమ్మెల్యే కామరాజ్ గురువారం ఉదయం తనను కలిశారని, ఆ తర్వాతే ఆయన ఆచూకీ గల్లంతైందని చెప్పారు. ఈ వ్యవహారం వెనుక టీవీకే హస్తం ఉండొచ్చని ఆయన ఆరోపించారు. ఈ పరిణామాలతో తమిళ రాజకీయాలు మరింత వేడెక్కాయి.