కొల్లు రవీంద్ర చెత్త రాజకీయాలు చేస్తున్నారు: పేర్ని నాని

మచిలీపట్నం రాజకీయాల్లో మాజీ మంత్రి పేర్ని నాని, ప్రస్తుత మంత్రి కొల్లు రవీంద్ర మధ్య మాటల యుద్ధం ముదురుతోంది. జగనన్న హౌసింగ్ కాలనీలకు సంబంధించిన స్టీల్ తరలింపు వ్యవహారం ఇప్పుడు అధికారుల మెడకు చుట్టుకునేలా కనిపిస్తోంది. 

పేర్ని నాని గతంలోనే హౌసింగ్ శాఖ అధికారులపై తీవ్ర స్థాయిలో మండిపడ్డారు. గత ప్రభుత్వం హౌసింగ్ కాలనీల కోసం కేటాయించిన స్టీల్‌ను అధికారులు వెనక్కి తీసుకెళ్లడంపై ఆయన ఆగ్రహం వ్యక్తం చేశారు. తాము మళ్లీ అధికారంలోకి వచ్చాక, నిబంధనలకు విరుద్ధంగా వ్యవహరించిన అధికారులను జైలుకు పంపుతామని ఆయన హెచ్చరించారు. తాజాగా ఈ వ్యాఖ్యలపై స్పందిస్తూ, తాను అధికారులను బెదిరించలేదని, కేవలం తప్పు చేసిన వారు శిక్ష అనుభవించక తప్పదని మాత్రమే చెబుతున్నానని స్పష్టం చేశారు. చట్టాన్ని ఉల్లంఘించే అధికారులకు భవిష్యత్తులో జవాబుదారీతనం ఉంటుందని ఆయన పునరుద్ఘాటించారు.

మరోవైపు, మచిలీపట్నంలోని నోబుల్ కాలేజీ సత్రం ఆక్రమణపై మంత్రి కొల్లు రవీంద్ర చేసిన ఆరోపణలను పేర్ని నాని తీవ్రంగా ఖండించారు. సత్రాన్ని తాను ఆక్రమించానన్నది పచ్చి అబద్ధమని, ఆ కాలేజీకి అద్దె ఎవరు చెల్లిస్తున్నారో తెలుసుకోవాలని ఆయన సూచించారు. కొల్లు రవీంద్ర ఇష్టానుసారం మాట్లాడుతూ 'చెత్త రాజకీయాలు' చేస్తున్నారని, ఇలాంటి తప్పుడు ఆరోపణలు మానుకోవాలని హితవు పలికారు. మచిలీపట్నం అభివృద్ధిపై కాకుండా వ్యక్తిగత విమర్శలపై దృష్టి పెట్టడం సరైన పద్ధతి కాదని ఆయన విమర్శించారు.