తొలి ఎన్నికల్లోనే టీవీకే సంచలనం... ఇద్దరు బ్రాహ్మణ అభ్యర్థులతో విజయ్ వ్యూహం సక్సెస్

తమిళనాడు రాజకీయాల్లో నటుడు విజయ్ స్థాపించిన తమిళగ వెట్రి కళగం (టీవీకే) తన తొలి అసెంబ్లీ ఎన్నికల్లోనే సంచలనం సృష్టించింది. ప్రధాన ద్రవిడ పార్టీలన్నీ దూరంగా పెట్టిన ఒక సాహసోపేతమైన ప్రయోగానికి టీవీకే శ్రీకారం చుట్టింది. ఇద్దరు బ్రాహ్మణ అభ్యర్థులను బరిలోకి దింపి ఆ పార్టీ తీసుకున్న నిర్ణయం ఇప్పుడు ఫలించింది. 

మైలాపూర్ నుంచి పార్టీ కోశాధికారి వెంకటరామన్, శ్రీరంగం నుంచి రమేశ్ అనే ఇద్దరు బ్రాహ్మణ అభ్యర్థులను టీవీకే నిలబెట్టగా, వారిద్దరూ తమ తమ నియోజకవర్గాల్లో ఘ‌న విజ‌యం సాధించారు. దీంతో వీరిద్ద‌రు కొత్త అసెంబ్లీలో బ్రాహ్మణ ప్రతినిధులుగా నిలిచారు. తమిళ రాజకీయాల్లో ఇది ఒక ముఖ్యమైన ఘట్టంగా చెప్పవచ్చు.

దాదాపు 35 ఏళ్లలో తొలిసారిగా డీఎంకే, అన్నాడీఎంకే, కాంగ్రెస్, బీజేపీ వంటి ప్రధాన పార్టీలు ఒక్క బ్రాహ్మణ అభ్యర్థికి కూడా టికెట్ కేటాయించలేదు. దశాబ్దాలుగా ఈ వర్గం ప్రాతినిధ్యం తగ్గుతూ వస్తున్నా, ప్రధాన పార్టీల జాబితా నుంచి పూర్తిగా కనుమరుగు కావడం ఇదే మొదటిసారి. ద్రవిడ రాజకీయాల్లో సామాజిక న్యాయం, బడుగు బలహీన వర్గాల ప్రాతినిధ్యానికే పెద్దపీట వేస్తున్న తరుణంలో టీవీకే వ్యూహం కొత్త చర్చకు దారితీసింది.

ఆసక్తికరంగా సీమాన్ నేతృత్వంలోని నామ్ తమిళర్ కట్చి (ఎన్‌టీకే) కూడా ఈ ప్రయోగాన్ని అనుకరించే ప్రయత్నం చేసింది. బ్రాహ్మణ జనాభా అధికంగా ఉండే టి.నగర్, మైలాపూర్, సైదాపేట్, అలందూర్ వంటి నియోజకవర్గాల్లో ఏకంగా ఆరుగురు బ్రాహ్మణ అభ్యర్థులను నిలబెట్టింది. అయితే, ఎన్‌టీకే ప్రయోగం పూర్తిగా విఫలమైంది. వారి ఆరుగురు అభ్యర్థులు ఓటమి పాలయ్యారు. కేవలం ఒక వర్గం వారిని నిలబెట్టినంత మాత్రాన ఎన్నికల్లో గెలవలేరని ఇది స్పష్టం చేస్తోంది.

ఈ కుల సమీకరణాలకు అతీతంగా మొత్తం ఎన్నికల ఫలితాల్లో టీవీకే తన ఆధిక్యాన్ని ప్రదర్శించింది. సుమారు 108 స్థానాల్లో గెలుపొంది, అసెంబ్లీలో అతిపెద్ద పార్టీగా అవతరించింది. వ్యూహాత్మకంగా కొద్దిమందికే అవకాశమిచ్చిన టీవీకే వ్యూహం ఫలించగా, అదే బాటలో వెళ్లిన ఎన్‌టీకే విఫలం కావడం తమిళ రాజకీయాల్లో కొత్త సమీకరణాలను సూచిస్తోంది.