అది డెడ్ బాలా?.. ఔటా?.. నితీశ్ రాణా ఔట్‌పై వివాదం!

ఢిల్లీలోని అరుణ్ జైట్లీ స్టేడియంలో జరిగిన ఐపీఎల్‌ మ్యాచ్‌లో ఢిల్లీ క్యాపిటల్స్ (డీసీ) బ్యాటర్ నితీశ్ రాణా ఔటైన తీరు ఇప్పుడు క్రికెట్ వర్గాల్లో ఆసక్తికర చర్చకు దారితీసింది. బలమైన గాలులు వీస్తున్న పిచ్‌పై నిలకడగా ఆడుతున్నట్లు కనిపించిన రాణా, స్వీప్ షాట్ ఆడే ప్రయత్నంలో డీప్ ఫైన్ లెగ్ ఫీల్డర్‌కు క్యాచ్ ఇచ్చి వెనుదిరిగాడు. అయితే, అతను క్యాచ్ ఔట్ అయ్యే క్షణానికి ముందే వికెట్ల పైనున్న ఒక బెయిల్ గాలికి కిందపడిపోయింది. ఈ ఘటనకు సంబంధించిన వీడియో సోషల్ మీడియాలో వైరల్ కావడంతో అసలు అది డెడ్ బాల్ కాదా అనే వాదన మొదలైంది.

ఈ ఘటన జరిగిన వెంటనే చాలా మంది పలు రకాల సందేహాలు వ్యక్తం చేశారు. అది హిట్ వికెట్ కావొచ్చని కొందరు, వికెట్ కీపర్ సంజూ శాంసన్ పొరపాటున వికెట్లను కదిలించి ఉంటాడని మరికొందరు అభిప్రాయపడ్డారు. అయితే, వీడియోను క్షుణ్ణంగా పరిశీలించినప్పుడు, బ్యాటర్ గానీ, కీపర్ గానీ వికెట్లను తాకలేదని స్పష్టమైంది. స్టేడియంలో వీస్తున్న బలమైన గాలుల కారణంగానే బెయిల్ కిందపడిందని నిర్ధారణ అయింది.

అసలు రూల్ ఏం చెబుతోంది?
ఈ వివాదంపై మేరిల్‌బోన్ క్రికెట్ క్లబ్ (ఎంసీసీ) నిబంధనలు స్పష్టతనిస్తున్నాయి. ఎంసీసీ చట్టంలోని రూల్ 20.4.2.6 ప్రకారం బౌలర్ బంతిని వేసేందుకు సిద్ధమవుతున్నప్పుడు గానీ, బంతిని అందుకుంటున్న సమయంలో గానీ బ్యాటర్‌కు ఏదైనా శబ్దం లేదా కదలిక వల్ల పరధ్యానం కలిగితే అంపైర్ దానిని 'డెడ్ బాల్'గా ప్రకటించవచ్చు.

కానీ, నితీశ్ రాణా విషయంలో అలా జరగలేదు. బౌలర్ బంతిని వదిలిన తర్వాత, రాణా షాట్ ఆడుతున్న సమయంలో బెయిల్ కింద పడింది. అంటే, బంతిని ఎదుర్కొనేటప్పుడు అతనికి ఎలాంటి పరధ్యానం కలగలేదు. కాబట్టి దీనిని డెడ్ బాల్‌గా ప్రకటించేందుకు నిబంధనలు అంగీకరించవు. అలాగే, బ్యాటర్ స్వయంగా వికెట్లను పడగొడితేనే దాన్ని హిట్ వికెట్‌గా పరిగణిస్తారు. ఇక్కడ గాలికి బెయిల్ పడటంతో హిట్ వికెట్ రూల్ వర్తించదు.

ఈ నేపథ్యంలో ఈ ఘటన విచిత్రంగా అనిపించినప్పటికీ, క్రికెట్ చట్టాల ప్రకారం అంపైర్లు తీసుకున్న నిర్ణయం సరైనదేనని క్రీడా నిపుణులు విశ్లేషిస్తున్నారు. మైదానంలో జరిగిన ఈ అనూహ్య సంఘటన, క్రికెట్ నియమాలపై మరోసారి విస్తృత చర్చకు తెరలేపింది.