టీసీఎస్ కేసులో నిదా ఖాన్‌కు షాక్.. ముందస్తు బెయిల్ పిటిషన్ తిరస్కరణ

దేశవ్యాప్తంగా సంచలనం సృష్టించిన నాసిక్ టీసీఎస్ (టాటా కన్సల్టెన్సీ సర్వీసెస్) కేసులో కీలక నిందితురాలిగా ఉన్న నిదా ఖాన్‌కు కోర్టులో చుక్కెదురైంది. ఆమె దాఖలు చేసుకున్న ముందస్తు బెయిల్ పిటిషన్‌ను నాసిక్‌లోని సెషన్స్ కోర్టు శనివారం తిరస్కరించింది. లైంగిక వేధింపులు, మతపరమైన మనోభావాలను దెబ్బతీయడం, బలవంతపు మతమార్పిడి వంటి తీవ్రమైన ఆరోపణల నేపథ్యంలో నిదా ఖాన్ కస్టోడియల్ విచారణ అవసరమన్న ప్రాసిక్యూషన్ వాదనలతో కోర్టు ఏకీభవించింది.

ఈ కేసులో నిదా ఖాన్ పాత్ర అత్యంత కీలకమని, ఆమెను కస్టడీలోకి తీసుకుని విచారిస్తేనే మరిన్ని వాస్తవాలు వెలుగులోకి వస్తాయని ప్రత్యేక పబ్లిక్ ప్రాసిక్యూటర్ అజయ్ మిసార్ కోర్టుకు తెలిపారు. నిందితురాలికి సంబంధించిన డిజిటల్ ఆధారాలు, ఆర్థిక లావాదేవీలు, మలేషియా, మాలేగావ్‌తో ఉన్న సంబంధాలపై దర్యాప్తు చేయాల్సి ఉందని వాదించారు. ఈ వాదనలను పరిగణనలోకి తీసుకున్న అదనపు సెషన్స్ జడ్జి కేజీ జోషి, బెయిల్ పిటిషన్‌ను కొట్టివేస్తూ ఉత్తర్వులు జారీ చేశారు.

ఈ కేసులో మొత్తం ఎనిమిది మంది నిందితులు ఉండగా, ఇప్పటికే ఏడుగురిని పోలీసులు అరెస్ట్ చేశారు. నిదా ఖాన్ ఒక్కరే పరారీలో ఉన్నారు. సహోద్యోగినిని బలవంతంగా మతమార్పిడి చేసేందుకు ప్రయత్నించారని, ఆమెకు బురఖా, మతపరమైన పుస్తకాలు ఇచ్చి ఒత్తిడి చేశారని నిదా ఖాన్‌పై ప్రధాన ఆరోపణలు ఉన్నాయి.

కోర్టు తీర్పుతో నిదా ఖాన్‌ను అరెస్ట్ చేసేందుకు పోలీసులకు మార్గం సుగమమైంది. కాగా, సెషన్స్ కోర్టు తీర్పును సవాలు చేస్తూ నిదా ఖాన్ తరఫు న్యాయవాదులు బాంబే హైకోర్టును ఆశ్రయించే అవకాశం ఉంది. మరోవైపు, ఈ కేసులో అరెస్టయిన నలుగురు నిందితుల పోలీసు కస్టడీని మే 5 వరకు పొడిగిస్తూ మరో కోర్టు ఆదేశాలు ఇచ్చింది.