చైనా కారు... 'రాకెట్'లా దూసుకుపోతుంది!

చైనాకు చెందిన ప్రముఖ ఎలక్ట్రానిక్స్ సంస్థ డ్రీమ్ టెక్నాలజీ ఆటోమొబైల్ రంగంలోకి అడుగుపెడుతూ సంచలనం సృష్టించింది. శాన్ ఫ్రాన్సిస్కోలో జరిగిన 'డ్రీమ్ నెక్స్ట్' ఈవెంట్‌లో 'నెబ్యులా నెక్స్ట్01 జెట్ ఎడిషన్' పేరుతో తన తొలి సూపర్ కారును ఆవిష్కరించింది. ఈ కారు కేవలం 0.9 సెకన్లలోనే 0 నుంచి 100 కిలోమీటర్ల వేగాన్ని అందుకుని, ఆటోమొబైల్ ప్రపంచంలో పెను ప్రకంపనలు రేపుతోంది.

ఈ అద్భుతమైన వేగానికి కారణం కారులో అమర్చిన డ్యూయల్ సాలిడ్ రాకెట్ బూస్టర్లు. సాధారణ ఎలక్ట్రిక్ మోటార్లతో పాటు ఈ రాకెట్ సిస్టమ్ 100 కిలోన్యూటన్ల శక్తిని విడుదల చేస్తుంది. కేవలం 150 మిల్లీసెకన్లలో స్పందించే ఈ టెక్నాలజీతో, ఈ కారు బుగాటీ చిరాన్, కోయినిగ్సెగ్ జెస్కో వంటి ప్రపంచ ప్రఖ్యాత హైపర్ కార్లకు గట్టి పోటీ ఇస్తోంది. భద్రత కోసం ప్రత్యేక ఎలక్ట్రానిక్ కంట్రోల్ సిస్టమ్‌లను కూడా పొందుపరిచారు.

కేవలం వేగమే కాదు, ఈ కారులో అత్యాధునిక బ్యాటరీ టెక్నాలజీని కూడా ఉపయోగించారు. సల్ఫైడ్ ఆధారిత ఆల్-సాలిడ్ స్టేట్ బ్యాటరీతో దీనిని రూపొందించారు. ఇది 450 డబ్ల్యూహెచ్/కేజీ కంటే ఎక్కువ ఎనర్జీ డెన్సిటీని కలిగి ఉండటమే కాకుండా, మెరుగైన భద్రతను అందిస్తుంది. ఒక్కసారి ఛార్జ్ చేస్తే ఈ కారు 550 కిలోమీటర్లకు పైగా ప్రయాణిస్తుంది. దీంతో పాటు 1 మిల్లీసెకన్‌లో స్పందించే స్టీర్-బై-వైర్ సిస్టమ్, టైర్ పంక్చర్ అయినప్పుడు కూడా కారును స్థిరంగా ఉంచే టెక్నాలజీ వంటివి ఇందులో ఉన్నాయి.

ఇక డ్రైవింగ్ అనుభవాన్ని మెరుగుపరచడానికి వీఎల్ఏ (విజన్-లాంగ్వేజ్-యాక్షన్) ఆధారిత ఇంటెలిజెంట్ డ్రైవింగ్ సిస్టమ్‌ను అమర్చారు. పొగ, పర్వత ప్రాంతాల వంటి కఠిన పరిస్థితుల్లోనూ ఇది సమర్థంగా పనిచేస్తుందని కంపెనీ తెలిపింది. 600 మీటర్ల దూరంలోని వస్తువులను కూడా గుర్తించగల శక్తివంతమైన డీహెచ్ఎక్స్1 ఎల్ఐడీఏఆర్ సెన్సార్ దీనిలోని మరో ప్రత్యేకత.

సెడాన్ ఆకారంలో ఉన్నప్పటికీ, స్పోర్ట్స్ కారు లుక్‌తో నెబ్యులా నెక్స్ట్01 ఆకట్టుకుంటోంది. ఈ కారు ధర, లభ్యతపై కంపెనీ ఇంకా వివరాలు వెల్లడించలేదు. ఏదేమైనా, ఈ రాకెట్-బూస్టెడ్ ఎలక్ట్రిక్ కారు భవిష్యత్ వాహన సాంకేతికతకు ఒక నిదర్శనంగా నిలుస్తోంది.