మేఘాలయ హనీమూన్ హత్య కేసు: సోనమ్ రఘువంశీకి బెయిల్.. పోలీసుల తప్పిదమే కారణం!

మేఘాలయ హనీమూన్ హత్య కేసులో ప్రధాన నిందితురాలిగా ఉన్న సోనమ్ రఘువంశీకి ఊరట లభించింది. ఆమె అరెస్టు ప్రక్రియలో పోలీసులు తీవ్రమైన తప్పిదాలకు పాల్పడ్డారని నిర్ధారించిన మేఘాలయ కోర్టు ఆమెకు బెయిల్ మంజూరు చేసింది. సాక్ష్యాధారాల కంటే అరెస్టు ప్రక్రియలోని లోపాలే ఈ కేసులో కీలకంగా మారాయి.

అరెస్ట్ సమయంలో తయారు చేసిన కీలక పత్రాలలో ఉనికిలో లేని చట్టపరమైన నిబంధనను పోలీసులు పేర్కొనడమే ఈ కేసులో కీలక మలుపునకు కారణమైంది. అరెస్ట్ మెమో, కేస్ డైరీ వంటి పత్రాల్లో 'భారతీయ న్యాయ సంహిత సెక్షన్ 403(1)' కింద అరెస్ట్ చేసినట్లు పోలీసులు నమోదు చేశారు. అయితే, అసలు అలాంటి సెక్షన్ ఒకటి లేదని కోర్టు స్పష్టం చేసింది. వాస్తవానికి హత్యకు సంబంధించిన 'సెక్షన్ 103(1)'ను అరెస్ట్ సమయంలో సోనమ్‌కు చూపిన పత్రాల్లో ఎక్కడా ప్రస్తావించలేదని కోర్టు గుర్తించింది. ఇది కేవలం 'రాత పొరపాటు' అనే పోలీసుల వాదనను కోర్టు తోసిపుచ్చింది.

అంతేకాకుండా, అరెస్ట్ అనంతరం ఘాజీపూర్‌లోని కోర్టులో హాజరుపరిచినప్పుడు సోనమ్‌కు న్యాయవాదిని కలిసే అవకాశం కల్పించినట్లు రికార్డుల్లో ఎలాంటి ఆధారాలు లేవని కోర్టు మరో లోపాన్ని ఎత్తిచూపింది.

షిల్లాంగ్ జిల్లా విడిచి వెళ్లరాదనే షరతుతో కోర్టు బెయిల్ మంజూరు చేసింది. అయితే, సోనమ్ విడుదల, ఆమె ఎక్కడ ఉండాలనే దానిపై ఇంకా స్పష్టత లేదని ఆమె సోదరుడు గోవింద్ తెలిపారు. "ఇప్పుడే ఆమెను ఇంట్లోకి రానివ్వం. ఒకవేళ తల్లిదండ్రులు ఆమెను ఇంటికి తీసుకురావాలనుకుంటే నేను ఇంట్లో ఉండను" అని ఆయన వ్యాఖ్యానించారు.

2025 మే నెలలో వివాహం చేసుకున్న సోనమ్, తన భర్త రాజా రఘువంశీతో కలిసి హనీమూన్ కోసం మేఘాలయకు వెళ్లారు. అనంతరం రాజా అదృశ్యం కాగా, జూన్ 2న ఒక లోయలో ఆయన మృతదేహం లభ్యమైంది. ఈ హత్యకు సోనమ్ కుట్ర పన్నిందని పోలీసులు ఆరోపించారు. ఈ కేసులో మొత్తం 8 మందిని అరెస్ట్ చేయగా, ముగ్గురు ఇప్పటికే బెయిల్‌పై విడుదలయ్యారు. దర్యాప్తు కొనసాగుతున్నప్పటికీ, అరెస్టు ప్రక్రియలోనే తీవ్ర లోపాలు బయటపడటంతో ఈ కేసు భవిష్యత్తుపై న్యాయపరమైన సవాళ్లు ఎదురయ్యే అవకాశం ఉంది.