ఓటీటీలో దూసుకుపోతున్న 'వశీకరణం'

క్షుద్ర శక్తులకు సంబంధించిన కంటెంట్ పట్ల కుతూహలాన్ని కనబరిచే ప్రేక్షకుల సంఖ్య ఎక్కువగానే ఉంటుంది. దెయ్యలకి సంబంధించిన హారర్ థ్రిల్లర్ సినిమాల తరువాత, ఈ తరహా కంటెంట్ పట్ల ఆసక్తిని చూపించేవారి శాతం ఎక్కువే. భయపడుతూ చూడటంలోనే థ్రిల్ ఫీలవుతూ ఉంటారు. అందువల్లనే ఈ తరహా కథలు ఓటీటీ సెంటర్లలోకి వరుసగా దిగిపోతున్నాయి. అలా 'సోనీ లివ్' ఓటీటీ ఫ్లాట్ ఫామ్ పైకి వచ్చిన హిందీ సిరీస్ గా 'వశీకరణం : కిస్ పర్ రఖే విశ్వాస్' కనిపిస్తుంది.  

 మార్చి 16వ తేదీ నుంచి ఈ సిరీస్ నుంచి ఎపిసోడ్స్ వదులుతూ వస్తున్నారు. ప్రతి సోమ వారం నుంచి శుక్రవారం వరకూ అందుబాటులోకి వస్తున్న కొత్త ఎపిసోడ్స్ తో ఈ సిరీస్ దూసుకుపోతోంది. ఇంతవరకూ ఈ సిరీస్ నుంచి 30 ఎపిసోడ్స్ ప్రేక్షకుల ముందుకు వచ్చాయి. స్నేహలత వసైకర్ ప్రధానమైన పాత్రను పోషించిన ఈ సిరీస్, ప్రస్తుతం హిందీ భాషలో మాత్రమే అందుబాటులో ఉంది. త్వరలో తెలుగులోను అందుబాటులోకి వచ్చే అవకాశాలు కనిపిస్తున్నాయి.

మహారాష్ట్ర ప్రాంతంలోని ఒక మారుమూల గ్రామంలో సుమన్ అనే శ్రీమంతురాలు ఉంటుంది. ఆ ఇంట్లో పెత్తనమంతా ఆమెదే. ఆమె కనుసైగలలోనే అన్ని పనులు జరిగిపోతూ ఉంటాయి. ఆమెకి ఎదురు మాట్లాడటానికి పనివాళ్లెవరూ సాహసించరు. ఆమెకి వశీకరణ విద్యలో ప్రవేశం ఉంటుంది. అందువలన పౌర్ణమి రోజులలో రహస్యంగా ఆమె ఆ తాంత్రిక విద్యను ప్రయోగిస్తూ ఉంటుంది. ఒక వ్యవసాయ కూలీ తల్లి ఈ విషయాన్ని బయటికి చెప్పడంతో అసలు కథ మొదలవుతుంది. భారీతనం .. నేపథ్య సంగీతం .. ఫొటోగ్రఫీ ఈ సిరీస్ ప్రధానమైన బలంగా నిలిచాయి.