పీవీ సింధు కంటి పక్కన ఏంటా పరికరం?.. అది ఏం చేస్తుంది?

భారత స్టార్ షట్లర్, ఒలింపిక్ పతక విజేత పీవీ సింధు ప్రస్తుతం డెన్మార్క్‌లో జరుగుతున్న ఉబెర్ కప్‌లో భారత జట్టుకు నాయకత్వం వహిస్తున్నారు. శుక్రవారం జరిగిన మ్యాచ్‌లో ఆమె విజయం సాధించారు. అయితే, ఆ మ్యాచ్‌లో సింధు ఆటతీరుతో పాటు ఆమె కంటి పక్కన ఉన్న ఒక చిన్న నీలి-బూడిద రంగు సెన్సర్ అందరి దృష్టిని ఆకర్షించింది. ఇది ఫ్యాషన్ కోసం పెట్టుకున్నది కాదు, క్రీడాకారుల పనితీరును విశ్లేషించే ఒక అత్యాధునిక టెక్నాలజీ అని తేలింది.

మెదడు పనితీరును చెప్పే 'టెంపుల్'
ఆ సెన్సర్‌ను 'టెంపుల్' అని పిలుస్తున్నారు. ఇది ఒక వినూత్నమైన వేరబుల్ టెక్నాలజీ ట్రాకర్. క్రీడాకారుల మెదడుకు జరిగే రక్త ప్రసరణను, నాడీ వ్యవస్థ పనితీరును, అభిజ్ఞా సామర్థ్యాలను ఇది నిజ సమయంలో ట్రాక్ చేస్తుంది. గత కొన్ని వారాలుగా శిక్షణలో దీనిని ఉపయోగిస్తున్న సింధు, తొలిసారిగా ఒక అంతర్జాతీయ మ్యాచ్‌లో దీనిని ధరించి బరిలోకి దిగారు. ప్రస్తుతం ఇది ఇంకా ప్రయోగ దశలోనే ఉంది.

పరికరాన్ని అభివృద్ధి చేస్తోన్న‌ జొమాటో ఫౌండర్ దీపిందర్ గోయల్ బృందం
ఈ పరికరాన్ని ప్రముఖ ఫుడ్ డెలివరీ సంస్థ జొమాటో వ్యవస్థాపకుడు దీపిందర్ గోయల్ బృందం అభివృద్ధి చేస్తోంది. ఒకవైపు క్రీడాకారిణిగా కొనసాగుతూనే, మరోవైపు వ్యాపారవేత్తగా మారిన సింధు ఈ టెక్నాలజీని పరీక్షించడంలో పాలుపంచుకుంటున్నారు. ఈ డివైజ్ పనితీరుపై సింధు చాలా ఉత్సాహంగా ఉన్నారని ఆమె భర్త, వ్యాపార భాగస్వామి అయిన వెంకట దత్తా సాయి తెలిపారు. మార్కెట్లో ఉన్న ఇతర పరికరాలతో పోలిస్తే ఇది అత్యంత కచ్చితత్వంతో పనిచేస్తుందని ఆయన వివరించారు.

ఇంకా టెస్టింగ్ దశలోనే ప‌రిక‌రం
కేవలం అంగుళం పొడవుండే ఈ డివైజ్ బ్లూటూత్ ద్వారా పనిచేస్తుంది. ఒక్కసారి ఛార్జ్ చేస్తే 3 నుంచి 4 రోజుల వరకు పనిచేస్తుంది. ఇది కేవలం హృదయ స్పందన రేటునే కాకుండా మెదడుపై పడే మానసిక శ్రమను (కాగ్నిటివ్ లోడ్) కూడా లెక్కిస్తుంది. దీని ద్వారా క్రీడాకారులు నిద్రపోతున్నప్పుడు కూడా వారి మెదడు ఎంత ఒత్తిడికి గురవుతుందో తెలుసుకోవచ్చని దత్తా సాయి పేర్కొన్నారు. ప్రస్తుతానికి ఈ 'టెంపుల్' డివైజ్ ఇంకా టెస్టింగ్ దశలోనే ఉంది, మార్కెట్లో అమ్మకానికి అందుబాటులోకి రాలేదు. ఈ కొత్త టెక్నాలజీని పరీక్షించడం ద్వారా సింధు తన ఆటను మరింత మెరుగుపరుచుకోవడంతో పాటు, వ్యాపార రంగంలోనూ తనదైన ముద్ర వేయడానికి ప్రయత్నిస్తున్నారు.