టాస్ వేళ రుతురాజ్ పేరు మర్చిపోయిన రవిశాస్త్రి... వీడియో ఇదిగో!

ఇండియన్ ప్రీమియర్ లీగ్ (ఐపీఎల్) 2026లో భాగంగా ముంబై ఇండియన్స్, చెన్నై సూపర్ కింగ్స్ జట్ల మధ్య పోరులో ఓ ఆసక్తికర సంఘటన చోటుచేసుకుంది. వాంఖడే మైదానంలో టాస్ సమయంలో... భారత క్రికెట్ దిగ్గజం, ప్రముఖ వ్యాఖ్యాత రవిశాస్త్రి, చెన్నై కెప్టెన్ రుతురాజ్ గైక్వాడ్ పేరును క్షణకాలం పాటు మర్చిపోయాడు. దీంతో అతడు కొద్దిసేపు నిశ్శబ్దంగా ఉండిపోవడం అందరి దృష్టిని ఆకర్షించింది.

వివరాల్లోకి వెళితే, రవిశాస్త్రి ఇరు జట్ల సారథులను పరిచయం చేసే క్రమంలో, ముంబై ఇండియన్స్ సారథి హార్దిక్ పాండ్యా పేరు చెప్పి, "నీలిరంగు జట్టు తరఫున హార్దిక్ పాండ్యా, పసుపుపచ్చ జట్టు తరఫున..." అంటూ ఒక్కసారిగా ఆగిపోయాడు. కొన్ని క్షణాల విరామం తర్వాత, గుర్తు తెచ్చుకుని "రుతురాజ్ గైక్వాడ్" అని పలికాడు. ఈ చిన్న పొరపాటుతో మైదానంలో నవ్వులు విరిశాయి. ఈ ఘటనకు సంబంధించిన దృశ్యాలు సామాజిక మాధ్యమాల్లో విస్తృతంగా వ్యాపించాయి.

ఈ పోరులో హార్దిక్ పాండ్యా టాస్ గెలిచి, ముందుగా ఫీల్డింగ్ ఎంచుకున్నాడు. ఈ సందర్భంగా రుతురాజ్ గైక్వాడ్ మాట్లాడుతూ, "మేము కూడా బౌలింగ్ చేయాలనే అనుకున్నాం. వాంఖడేలో మొదట బ్యాటింగ్ చేసినా, బౌలింగ్ చేసినా ఉత్తమ ప్రదర్శన ఇవ్వాల్సిందే. మా ఆటతీరు బాగుంది, కానీ కొన్ని కీలక సమయాల్లో మాకు అనుకూలంగా మలుచుకోలేకపోతున్నాం" అని వివరించారు.

కాగా, తొడ కండరాల గాయం కారణంగా ముంబై ఆటగాడు రోహిత్ శర్మ ఈ పోటీలో ఆడలేదు. మరోవైపు, పిక్క కండరాల నొప్పితో బాధపడుతున్న చెన్నై ఆటగాడు ధోని ఇంకా కోలుకోకపోవడంతో ఈ ఐపీఎల్ సీజన్‌లో ఇప్పటివరకు మైదానంలోకి అడుగుపెట్టలేదు.