వాన శబ్దానికి వేగంగా మొలకెత్తే విత్తనాలు.. ఎంఐటీ పరిశోధనలో ఆసక్తికర విషయాలు!

వర్షం పడుతున్నప్పుడు వచ్చే శబ్దం మనలో చాలామందికి ప్రశాంతతను ఇస్తుంది. కానీ, భూమిలోని విత్తనాలకు మాత్రం అది మేల్కొలుపులా పనిచేస్తుంది. వర్షం సవ్వడి విన్న విత్తనాలు చాలా వేగంగా మొలకెత్తుతాయని అమెరికాలోని మసాచుసెట్స్ ఇన్‌స్టిట్యూట్ ఆఫ్ టెక్నాలజీ (ఎంఐటీ) శాస్త్రవేత్తలు తమ పరిశోధనలో గుర్తించారు. పరిసరాల్లోని సహజ శబ్దాలను విత్తనాలు గ్రహించగలవని ప్రత్యక్షంగా నిరూపితం కావడం ఇదే తొలిసారి కావడం విశేషం. ఈ అధ్యయనం 'సైంటిఫిక్ రిపోర్ట్స్' జర్నల్‌లో ప్రచురితమైంది.

ఈ పరిశోధన కోసం శాస్త్రవేత్తలు సుమారు 8,000 వరి విత్తనాలను ఉపయోగించారు. కొన్ని విత్తనాలను నీటిలో ఉంచి, వాటిపై తేలికపాటి నుంచి భారీ వర్షాన్ని పోలిన నీటి చుక్కల శబ్దాన్ని వినిపించారు. మరికొన్ని విత్తనాలను అవే పరిస్థితుల్లో ఎలాంటి శబ్దం లేకుండా ఉంచారు. వర్షం శబ్దాన్ని విన్న విత్తనాలు, నిశ్శబ్దంగా ఉన్న వాటితో పోలిస్తే 30 నుంచి 40 శాతం వేగంగా మొలకెత్తడం గమనార్హం.

విత్తనం లోపల ఈ ప్రక్రియ ఎలా జరుగుతుందంటే.. మొక్కల కణాల్లో 'స్టాటోలిత్' అనే సూక్ష్మమైన నిర్మాణాలు ఉంటాయి. నీటి చుక్కలు భూమిని తాకినప్పుడు బలమైన శబ్ద తరంగాలు పుడతాయి. ఈ తరంగాల వల్ల విత్తనాల్లో కదలికలు ఏర్పడి, లోపలున్న స్టాటోలిత్‌లు కదులుతాయి. ఈ కదలికే విత్తనానికి ఒక జీవ సంకేతంగా పనిచేసి, మొలకెత్తే ప్రక్రియను ప్రారంభించమని ఆదేశిస్తుంది. భూమి పైపొరలకు దగ్గరగా ఉన్న విత్తనాలపై ఈ ప్రభావం ఎక్కువగా ఉంటుందని పరిశోధకులు గమనించారు.

వర్షం శబ్దం నుంచి వచ్చే శక్తి, విత్తనం పెరుగుదలను వేగవంతం చేయడానికి సరిపోతుందని ఈ పరిశోధన బృందానికి నేతృత్వం వహించిన ప్రొఫెసర్ నికోలస్ మాక్రిస్ వివరించారు. గాలి, ఇతర సహజ ప్రకంపనలు కూడా ఇతర విత్తనాలపై ఇలాంటి ప్రభావం చూపుతాయా అనే కోణంలో తదుపరి పరిశోధనలు చేయనున్నట్లు వారు తెలిపారు.