దోమతెర కప్పుకుని డ్యూటీ.. హైదరాబాద్ సెక్యూరిటీ గార్డ్ వీడియో వైరల్!

హైదరాబాద్‌కు చెందిన ఓ సెక్యూరిటీ గార్డ్ వీడియో ప్రస్తుతం సోషల్ మీడియాలో అందరి దృష్టిని ఆకర్షిస్తూ, తీవ్ర చర్చకు దారితీసింది. ఓ నివాస సముదాయంలో రాత్రి షిఫ్ట్‌లో పనిచేస్తున్న సెక్యూరిటీ గార్డ్ దోమల నుంచి రక్షించుకోవడానికి దోమతెర కప్పుకుని విధుల్లో ఉండటం ఈ వీడియోలో ఉంది. ఈ దృశ్యం సెక్యూరిటీ గార్డులు ఎదుర్కొంటున్న కష్టతరమైన పని పరిస్థితులను కళ్లకు కడుతోంది. 

సూరజ్ కుమార్ బౌధ్ అనే యూజర్ ఈ వీడియోను 'ఎక్స్‌' (ట్విట్టర్)లో పోస్ట్ చేశారు. రాత్రిపూట ఓ సెక్యూరిటీ గార్డ్ కుర్చీలో కూర్చుని దోమతెర కప్పుకుని ఉండటాన్ని ఆయన వీడియో తీశారు. అపార్ట్‌మెంట్‌లోని నివాసితులు ఏసీ గదుల్లో హాయిగా నిద్రిస్తుంటే, రాత్రంతా బయట విధులు నిర్వర్తించే ఈ గార్డులకు కనీసం సురక్షితమైన, సౌకర్యవంతమైన స్థలాన్ని ఎందుకు కల్పించలేరని ఆయన ప్రశ్నించారు. పేదల పట్ల ప్రజల్లో సానుభూతి, సున్నితత్వం తగ్గిపోవడమే అసలు సమస్య అని ఆయన ఆవేదన వ్యక్తం చేశారు.

ఈ వీడియో వైరల్ కావడంతో సెక్యూరిటీ గార్డుల దుస్థితిపై నెటిజన్ల నుంచి పెద్ద ఎత్తున స్పందన వస్తోంది. "ఇది డ్యూటీ కాదు, ఆధునిక బానిసత్వం" అని ఒకరు కామెంట్ చేయగా, "ఈ దృశ్యం నిజంగా హృదయాన్ని కలిచివేస్తోంది" అని మరొకరు పేర్కొన్నారు. "ఈ గార్డుల బాధ్యత సొసైటీ యాజమాన్యానిదే, కానీ వారు ఏమాత్రం పట్టించుకోవడం లేదు" అంటూ పలువురు తమ అభిప్రాయాలను పంచుకుంటున్నారు.