ఐపీఎల్‌లో కేకేఆర్ పేలవ ప్రదర్శన.. ఇలాగైతే ప్లే ఆఫ్స్ కష్టమే!

ఐపీఎల్ 2026లో కోల్‌కతా నైట్ రైడర్స్ (కేకేఆర్‌) పేలవ ప్రదర్శన కొనసాగుతోంది. శుక్రవారం అహ్మదాబాద్‌లోని నరేంద్ర మోదీ స్టేడియంలో గుజరాత్ టైటాన్స్ (జీటీ)తో జరిగిన మ్యాచ్‌లో అజింక్య రహానే నేతృత్వంలోని కేకేఆర్ 5 వికెట్ల తేడాతో ఓటమిపాలైంది. ఈ సీజన్‌లో ఆరు మ్యాచ్‌లు ఆడిన కోల్‌కతాకు ఇది ఐదో ఓటమి. పంజాబ్ కింగ్స్‌తో జరగాల్సిన మ్యాచ్ వర్షం కారణంగా రద్దు కావడంతో ఆ జట్టు ఖాతాలో కేవలం ఒక పాయింట్ మాత్రమే ఉంది.

ఈ మ్యాచ్‌లో మొదట బ్యాటింగ్ చేసిన కేకేఆర్, ఆల్-రౌండర్ కామెరాన్ గ్రీన్ (55 బంతుల్లో 79) ఒంటరి పోరాటం చేయడంతో 180 పరుగులకు ఆలౌట్ అయింది. అనంతరం 181 పరుగుల లక్ష్యంతో బరిలోకి దిగిన గుజరాత్ టైటాన్స్.. కెప్టెన్ శుభ్‌మన్ గిల్ (50 బంతుల్లో 86) అద్భుత ఇన్నింగ్స్‌తో మరో రెండు బంతులు మిగిలి ఉండగానే 19.4 ఓవర్లలో లక్ష్యాన్ని ఛేదించింది. తొలి రెండు మ్యాచ్‌లలో ఓడి పుంజుకున్న గుజరాత్‌కు ఇది వరుసగా మూడో విజయం.

కేకేఆర్‌కు ప్లే ఆఫ్స్ కష్టమే.. సంక్లిష్టంగా మారిన సమీకరణాలు
ప్రస్తుతం -1.149 నెట్ రన్ రేట్‌తో కేకేఆర్ పాయింట్ల పట్టికలో చివరి స్థానంలో నిలిచింది. అయితే, గణాంకాల ప్రకారం ప్లే ఆఫ్స్ ఆశలు ఇంకా పూర్తిగా ముగిసిపోలేదు. కేకేఆర్ ఇంకా 8 మ్యాచ్‌లు ఆడాల్సి ఉంది. వాటన్నింటిలోనూ గెలిస్తే 17 పాయింట్లతో ప్లే ఆఫ్స్‌కు అర్హత సాధించే అవకాశం ఉంది. ఒకవేళ ఏడు మ్యాచ్‌లు గెలిచినా 15 పాయింట్లతో అవకాశాలు ఉంటాయి. కానీ, రెండు మ్యాచ్‌లలో ఓడితే మాత్రం, 13 పాయింట్లతో మిగిలి ఇతర జట్ల ఫలితాలపై ఆధారపడాల్సి వస్తుంది.