కోల్‌కతాలో వ్యాపారవేత్త నివాసంలో ఈడీ సోదాలు

పశ్చిమ బెంగాల్ అసెంబ్లీ ఎన్నికల వేడి కొనసాగుతున్న సమయంలో ఎన్‌ఫోర్స్‌మెంట్ డైరెక్టరేట్ (ఈడీ) అధికారులు మరోసారి సోదాలతో కలకలం సృష్టించారు. కోల్‌కతాలోని మిడిల్‌టన్ స్ట్రీట్‌లో నివాసం ఉంటున్న ప్రముఖ వ్యాపారవేత్త కేఎల్ ధనియా ఇంట్లో ఈరోజు ఉదయం నుంచి ఈడీ అధికారులు తనిఖీలు నిర్వహిస్తున్నారు.

ఆర్థిక లావాదేవీల్లో అక్రమాలు జరిగాయన్న ఆరోపణల నేపథ్యంలో ఈ సోదాలు జరుగుతున్నట్లు సమాచారం. భారీ భద్రతా బలగాలతో ధనియా నివాసానికి చేరుకున్న అధికారులు.. ఆయన వ్యాపారాలకు సంబంధించిన పత్రాలు, బ్యాంకు ఖాతాల వివరాలు, హార్డ్ డిస్కులను క్షుణ్ణంగా పరిశీలిస్తున్నారు. మనీ లాండరింగ్ కోణంలో ఈ విచారణ కొనసాగుతున్నట్లు ప్రాథమికంగా తెలుస్తోంది.

గత కొంతకాలంగా కోల్‌కతాలో ఈడీ దాడులు వరుసగా జరుగుతున్నాయి. ఈ క్రమంలో, ఎన్నికల సమయంలో వ్యాపారవేత్త ధనియా నివాసంలో జరుగుతున్న ఈ సోదాలు ప్రాధాన్యత సంతరించుకున్నాయి. తనిఖీల్లో ఏమైనా కీలక పత్రాలు గానీ, నగదు గానీ లభించిందా అనే వివరాలు తెలియరాలేదు. దర్యాప్తు పూర్తయిన తర్వాత పూర్తి వివరాలను ఈడీ అధికారులు వెల్లడించే అవకాశం ఉంది.