సింగపూర్ వెళుతున్న మంత్రులతో సీఎం చంద్రబాబు సమావేశం

 ఆంధ్రప్రదేశ్‌లో పాలన, మౌలిక సదుపాయాల కల్పనలో అత్యుత్తమ విధానాలను అమలు చేసే దిశగా ప్రభుత్వం కీలక అడుగు వేస్తోంది. ఇందులో భాగంగా రాష్ట్రానికి చెందిన 9 మంది మంత్రుల బృందం సింగపూర్‌లో పర్యటించనుంది. ఈ నెల 21వ తేదీ నుంచి 27వ తేదీ వరకు ఈ పర్యటన కొనసాగుతుంది. సింగపూర్‌లోని అధునాతన పాలనా వ్యవస్థ, శాంతిభద్రతల నిర్వహణ, రోడ్లు, పర్యాటక రంగాలను సమగ్రంగా అధ్యయనం చేయడమే ఈ పర్యటన యొక్క ప్రధాన లక్ష్యం.

ఈ పర్యటన నేపథ్యంలో ముఖ్యమంత్రి చంద్రబాబు శనివారం మంత్రుల బృందంతో ప్రత్యేకంగా సమావేశమై పలు సూచనలు చేశారు. మంత్రులు నారాయణ, పయ్యావుల కేశవ్, అనగాని సత్యప్రసాద్, జనార్దన్ రెడ్డి తదితరులు ఈ సమావేశంలో పాల్గొన్నారు. 

సింగపూర్‌లోని పరిస్థితులను క్షుణ్ణంగా పరిశీలించాలని, అక్కడి విజయవంతమైన విధానాల్లో వేటిని ఏపీలో అమలు చేయవచ్చో గుర్తించాలని సీఎం సూచించారు. తెలుసుకున్న ఉత్తమ విధానాలను రాష్ట్రానికి తిరిగి వచ్చాక అందరితో పంచుకుని, వాటి అమలుకు కృషి చేయాలని చంద్రబాబు మంత్రులకు స్పష్టం చేశారు. ఈ పర్యటన ద్వారా సింగపూర్ తరహాలో అత్యుత్తమ పాలన, మౌలిక వసతులు, పర్యాటకాన్ని ఏపీలో అభివృద్ధి చేయాలని ప్రభుత్వం లక్ష్యంగా పెట్టుకుంది.