మహిళా కోటాకు డీలిమిటేషన్ కు లింక్ ఏమిటి?.. కేంద్రాన్ని నిలదీసిన ప్రతిపక్షాలు

మహిళా రిజర్వేషన్ బిల్లును నియోజకవర్గాల పునర్విభజనతో ముడిపెట్టడం వెనుక కేంద్ర ప్రభుత్వ ఉద్దేశం ఏమిటని కాంగ్రెస్ ఎంపీ గౌరవ్ గొగోయ్ ప్రశ్నించారు. లోక్‌సభలో సీట్లను 850కి పెంచాలనే ఆలోచన ఎక్కడి నుంచి వచ్చిందని, ఈ సంఖ్య నాగ్‌పూర్‌ నుంచి వచ్చిందా? అంటూ ఆయన ప్రభుత్వాన్ని నిలదీశారు. ప్రభుత్వం ‘బుల్డోజర్’ తరహాలో ఏకపక్షంగా వ్యవహరిస్తోందని ఆయన ఆరోపించారు.

మూడు రోజుల పార్లమెంట్ ప్రత్యేక సమావేశాలు ఈ రోజు ఉదయం ప్రారంభమైన విషయం తెలిసిందే. కేంద్ర న్యాయశాఖ మంత్రి అర్జున్ రామ్ మేఘవాల్ మహిళా రిజర్వేషన్ బిల్లుతో పాటు, రాజ్యాంగ సవరణ, డీలిమిటేషన్ బిల్లులను సభలో ప్రవేశపెట్టారు. ప్రధాని నరేంద్ర మోదీ ఈ చర్యను మహిళా సాధికారతలో ఒక ‘చరిత్రాత్మక అడుగు’గా అభివర్ణించారు. అయితే, మహిళా కోటాకు సూత్రప్రాయంగా మద్దతు ఇస్తున్న విపక్షాలు, డీలిమిటేషన్ నిబంధనను మాత్రం తీవ్రంగా వ్యతిరేకిస్తున్నాయి. ఇది పూర్తిగా రాజకీయ ప్రేరేపితమని, దీని వెనుక వేరే ఉద్దేశాలు ఉన్నాయని ఆరోపిస్తున్నాయి. లోక్‌సభలో ఎన్డీయేకు 292 సీట్లు ఉండగా, బిల్లు ఆమోదానికి మూడింట రెండొంతుల మెజారిటీ అవసరం కావడంతో ఈ చర్చ కీలకంగా మారింది.